فيه أسئلة معينة بتضايق أي بنت. ودايمًا بتحاول تبعد عن أي موضوع، ممكن ينتهي بسؤال منهم. غالبًا مصدر الأسئلة دي، هو فضول الآخرين المبالغ فيه، سواء رجالة أو ستات. وحبهم غير المفهوم لجمع أكبر معلومات عن المحيطين بيهم. الأسئلة دي بتضايق البنات وتأثر على نفسيتهم، وبتسبب مشاكل كتيرة تانية. تعالوا نعرف الأسئلة دي:
عندك كام سنة؟
واحد من أسخف الأسئلة اللي بتتوجه للبنات أوالستات. كتير بيحسوا بالإحراج بسببه، لإن الست بطبعها بتميل دايمًا إنها تكون مثالية وصغيرة. وبيفضلوا يحتفظوا بالإجابة لنفسهم علشان مايتحكمش عليهم.
هنفرح بيكي أمتى؟
فيه ناس نظرتها للحياة محدودة، وبتشوف جواز البنات أكبر إنجاز ممكن توصله في حياتها. ماننكرش إن العيلة والأسرة شئ لطيف. لكن عدم وجودها مايبررش سيول من الأسئلة، اللي كل إجابتها في علم الغيب. فياريت نتمنى حياة سعيدة لغيرنا، بغض النظر عن حالتهم الاجتماعية.
انتِ تخينة كده ليه؟
ساعات زيادة الوزن بتكون لها علاقة بأمراض معينة أو وراثة، بالتالي مش مقبول نضغط على الناس، ونأثر بالسلب على نفسيتهم، بسبب ظرف زي ده. ده غير إنهم ممكن يكونوا مرتاحين لشكلهم تمامًا، والمشكلة عند اللي بيسأل.
هنشيل ولادك أمتى؟
طبعًا جواز البنت مش بيخلصها من الأسئلة والتحقيقات، لأنها بتدخل مرحلة أسئلة الحمل والخلفة. لازم نعرف إن دي أمور شخصية ماينفعش نتدخل فيها. كل شخص حر في اختيار ستايل وشريك حياته.
ليه انفصلتوا؟
مش كل ست مرت بتجربة الطلاق، بتكون حابة تشارك قصتها مع المحيطين بيها. سؤال زي ده هيخليها تفتكر كل المشاعر السلبية والألم النفسي اللي مرت بيه. وده بالتالي هيأثر على الحالة النفسية بشكل مش لطيف.
