أدوات شخصية كتير في حياتنا، اتعودنا بعد ما نستخدمها نحتفظ بيها في الحمام، لحد ما ييجي ميعاد استخدامها تاني، وبقينا شايفين إنه ده المكان الطبيعي ليها! زي: فرشة الأسنان، ماكينة الحلاقة، الفوط، وغيره، والحقيقة إننا بنأذي صحتنا وإحنا مش واخدين بالنا. علشان كده، هنقولكم على حاجات من الأفضل لينا نشيلها في مكان غير الحمام خالص، وده بحسب تقرير علمي نشره مؤخرًا موقع "الكونسلتو":
1- فرشة الأسنان
وجود فرشة الأسنان في الحمام، بيخليها بيئة خصبة لنمو البكتريا والفطريات، نتيجة رطوبة الحمام وانخفاض درجة الحرارة فيه، يفضل بعد استعمال الفرشة وضعها في مكان جاف.
2- الفوط
فواطة الحمام من الأساسيات، وطول الوقت بنحرص إن الفوط تكون موجودة عليها، بس للأسف، جه الوقت اللي نغير فكرتنا عن الأمر ده، لإن البكتيريا بتتراكم علي الفوط، وده بيخلي رائحتها مش لطيفة، بالإضافة للإصابة بالعدوى عند استخدامها.
3-شفرات الحلاقة
زيها زي فرشاة الأسنان بالظبط، المكان المناسب لتخزينها لازم يكون جاف، وده أبعد ما يكون عن الحمام لأنه دايمًا مبلل ومليان بكتيريا.
4- علب الأدوية
بعض الأشخاص بيحتفظوا بالأدوية في الحمام، والأمر ده بيعرضها للتلف بشكل أسرع، وبيخلي صلاحيتها تنتهي في وقت قصير، فمن الأفضل نشيلها في الثلاجة.
5- الملابس
ساعات بنغير هدومنا في الحمام، أو بننساها ونرجع نلبسها تاني، السلوك ده مش صحي خالص، لإنه بيزود فرص الإصابة بالعدوى، علشان البكتريا الموجودة في الحمام بتكون استقرت على الهدوم لفترة طويلة، وبالتالي ممكن تصيبنا بأمراض جلدية.
