بما إن أغلب الناس بقالها حوالي شهرين بتشتغل من البيت، بسبب كورونا. فالموضوع مع الوقت بقى بيحتاج اهتمام أكتر. يعني فيه اللي بيشتغل وهو على السرير أو على الكنبة أو أي مكان جنب الفيشة، بس ممكن مايبقاش مرتاح نفس راحة الشغل على المكتب. علشان كده إحنا هنقول لك على 5 نصايح، تساعدك تعمل مكتب مناسب جوة البيت. علشان تعرف تشتغل براحتك وفي أحسن حال:

1- دور على أفضل مكان أو ركن

شوف جوة البيت ركن مناسب أو أفضل مكان ينفع تشغل فيه، بعيد عن الدوشة. علشان تقدر تركز وتنجز المطلوب منك بكفاءة عالية، خاصة لو بتشتغل لساعات طويلة.

 

2- الإضاءة المناسبة

الإضاءة من أهم العوامل اللي بتأثر على شغلك، بداية من قدرتك على الإنتاج لحد صحتك العقلية. فلازم تختار المكان بناءً على مصدر الإضاءة الطبيعية خلال النهار، لإنها الأفضل. وفي ساعات الليل لازم توفر مصدر إضاءة مناسب وقوي.

 

3- ترتيب الأدوات

لازم يكون مكتبك اللي هتشتغل عليه مترتب كويس، وتتأكد من وجود أداوت المكتب اللي ممكن تحتاجها زي: الملفات والمجلدات وغيرهم. ويستحسن يكون فيه أدراج هتساعدك تحتفظ بكل الحاجات في مكان واحد.

 

4- استغلال الرفوف والأدراج

ممكن تخلي المكتب بتاعك في مكان فيه رفوف، أو جنب درج معين. لإنك ممكن تستغل الأجزاء دي وتحط عليها أدواتك، زي اللابتوب أو شوية كتب محتاجها. وبكده تبقى وسعت المساحة اللي بتستغلها، من غير ما توسع المساحة اللي انت شاغلها.

 

5- استغل قطع الأثاث

لو ماعندكش ترابيزة مكتب مخصوص في البيت، تقتدر تبدلها بأي ترابيزة صغيرة من قطع الأثاث. خاصة لو مفيش حد بيستخدمها. ويكون سهل عليك تحطها في أي مكان.