من وقت ما بدأ انتشار فيروس كورونا، انتشر معاه هوس شراء وتخزين أدوات التعقيم والمطهرات. اللي اختفت بشكل ملحوظ من الصيدليات، وبقى الحصول عليها أمر شبه مستحيل. بس ماتقلقوش، إحنا هنقول لكم على أهم النصايح اللي تغنيكم عن شراء المطهرات:
1- اعمل مطهر الإيد في البيت
اللي محتاجه:
2/3 كوباية من الكحول المحمر (الإيزوبوروبيل) أو كحول الإيثانول
1/3 كوباية جيل الصبار
تقدر كمان تضيف زيوت زي: زيت اللافندر أو عصير الليمون علشان تكون ريحته منعشة.
بعدها تخلط المكونات دي كلها مع بعض، وتحطها في إزازة بلاستيك للاستخدام.
2- اشتريه أونلاين
لو مش لاقي مطهر الإيد في صيدليات منطقتك، ماتقلقش. تقدر تشتريه من تطبيقات البيع أونلاين زي: سوق (souq) أو يداوي (yodawy).
3- عقم الأسطح أول بأول
اتأكد من تنظيف وتطهير الأسطح اللي بتلمسها كتير زي مقابض الأبواب، مفاتيح الإضاءة، المكاتب، الحنفيات، وغيرها. من خلال مطهر معمول في البيت، عبارة عن إضافة المياه للكلور. كل اللي عليك هو تضيف 4 معالق صغيرة كلور على ربع لتر مياه، وتحطهم في إزازة إسبراي.
4- المياه والصابون
قبل ما نعرف حاجة اسمها مطهر الإيد، كان المياه والصابون هم الحل المثالي للنظافة. والمفاجأة إنهم لسه حل مثالي. علشان كده اغسل ايدك بانتظام لمدة 20 ثانية بالمياه والصابون. وممكن تشيل معاك صابونة في علبة صغيرة على طول، علشان تغسيل إيدك عند اللزوم.
5- ممنوع لمس الوش
حاول على قد ما تقدر ماتلمسش وشك بإيدك، بدون غسلها. ابعد إيدك تمامًا لمس عن عينيك أو أنفك أو فمك. واحرص دايمًا على غسل إيدك باستمرار.
وبمجرد ما تكون مطهرات الإيد متوفرة في الصيدليات، اشتري على قد استخدامك. ودايمً اعمل حساب غيرك.
