من وسط ألوان مختلفة كتيرة، دايمًا في الخروجات بنختار الكوتشي الأبيض. شكله شيك وبيليق على كل حاجه تقريبًا، لكن للأسف بيتوسخ بسرعة من أول لبسة ولونه بيتغير. وطبعًا بنقع في ورطة تنظيفه. علشان كده جمعنا لكم 5 طرق بسيطة، هتساعدكم في تنظيف الكوتشي بمواد موجودة في البيت. يلا نعرفها: 

1- بيكينج صودا وخل أبيض 

معلقة كبيرة خل أبيض، معلقة كبيرة بيكينج صودا، ومعلقة كبيرة مياه ساخنة. اخلطهم مع بعض لحد ما يعملوا معجون. وبفرشة أسنان قديمة افرك الكوتشي والنعل، وسيب المعجون على الكوتشي في الشمس لمدة 3 أو 4 ساعات. بعدها نفض الفردتين على بعض علشان تشيل أي أجزاء زيادة. بكده هتتخلص من كل البقع الموجودة على الكوتشي، وكمان هتقضي على الروائح الكريهة اللي سببتها البكتيريا.

 

2- معجون الأسنان

حط معجون الأسنان على الكوتشي وافركه بفرشة أسنان قديمة. واستمر لحد ما كل الأجزاء المبقعة يتحول لونها للأبيض. نفس الكلام ينطبق على النعل. سيب المعجون على الكوتشي لمة 15 دقيقة، بعدها شيله بقطعة قماش مبلولة أو إسفنجة. هتلاقي نتايج مذهلة.

 

3- ملح خشن وصابون سائل

افرك الكوتشي بحوالي 150 جرام من الملح الخشن، من برة وكمان من جوة. سيب الملح عليه لمدة ساعة على الأقل، واغسله بمياه باردة مع الصابون السائل. الكوتشي هينضف والملح هيزيل الروائح الكريهة.

 

4- الليمون

 

 

لو هتستخدم مثلًا ليمونتين، مقدار العصارة بتاعتهم زود عليه مقدار مياه قده 3 مرات. افرك الكوتشي بالخليط ده، وهتحتاج تفرك بقوة على الأجزاء المتسخة أكتر. بعد كده اشطف الكوتشي  بالمياه وسيبه ينشف.

 

5- محلول أمونيا

 

من أكتر الطرق الفعالة لتنظيف الكوتشي، لكن ضروري ناخد احتياطاتنا ونلبس جونتي خلال استخدامه. استخدم محلول أمونيا مخفف، 50% أمونيا و50% مياه. اغمس قطعة قماش قديمة في المحلول، وافرك الكوتشي. بعد كده اشطفه بالمياه وسيبه يجف لمدة 24 ساعة، علشان تتخلص من الريحة القوية.