العالم بيستعد لمواجهة الموجة الثانية من فيروس "كورونا" المستجد، واللي بالفعل ظهرت بوادرها في أكثر من دولة أوروبية. وعلشان نعدي من الموجة دي بسلام، لازم نقوم بشوية عادات مهمة لصحتنا الجسدية والنفسية، والعادات دي بحسب ما نشرها موقع "الكونسلتو" هي:
1- نظم حياتك بـ روتين يومي
خلال فترة الحجر الصحي اللي فاتت، بعض الناس نظام حياتها اتلخبط، سواء كان في ساعات النوم أو عدد الوجبات ونوعيتها، الأمر اللي أثر بالسلب على صحتهم، علشان كده ضروري تعمل جدول وتكتب فيه مثلًا مواعيد تمارينك وأي نشاط تاني بتقوم بيه على مدار اليوم.
2- اتحرك كتير
مهما كانت حركتك محدودة بسبب العزل الاجتماعي، مهم جدًا تتحرك بشكل مستمر، والحركة هنا مش معناها ممارسة تمارين صعبة، بالعكس أقل حركة هتفيد صحتك وكمان نفسيتك، وأفضل التمارين للحركة هي نزول السلالم أو المشي.
3- اعمل استريتشات
تعرف إن تمارين التمدد بتقوي العضلات وبتزود مرونتها؟ وتعتبر اليوجا من أفضل تمارين المرونة اللي ممكن تعملها وأنت في البيت، كمان هتساعدك على الاسترخاء وهتقلل الشعور بالتوتر والقلق المصاحبين للفترة الحرجة دي.
4- شوف الإيجابيات حواليك
كتابة 3 حاجات حلوة بتحصل في حياتك كل يوم في دفتر خاص، هيساعدك في التعامل بشكل أحسن مع المشاعر السلبية اللي ممكن تمر بيها في فترة الكورونا.
5- اهتم بالحصول على فيتامين "د"
أجسامنا مبتاخدش احتياجاتها اليومية من فيتامين "د" بشكل طبيعي من خلال آشعة الشمس، علشان كده الأطباء بينصحوا بتناول مكملات فيتامين "د" الغذائية وقت الحجر الصحي.
