صحيح الانطباع الأول بيدوم، لكن ده مايمنعش إنه ممكن يتغير برضو مع الوقت. وزي ما في ناس مع الوقت بتقرب مننا أكتر، فيه ناس تانية بنلاقيهم بيبعدوا بالتدريج. والبعد ده بيكون له أسباب كتيرة، جزء منها بيكون الكلام. فيه عبارات معينة بنستخدمها أحيانًا من غير ما ناخد بالنا، بتخلي اللي حوالينا يبعدوا. تعالوا نعرفها أهم 5 عبارات ممكن توصلنا للنتيجة دي:

1- "مش قصدي أضايقك، لكن.."

زي لما تحاول تفرض على حد رأيك بخصوص لبسه مثلًا، أو روتين بيعمله. فكرة تعزيز الثقة بالنفس على حساب الآخرين، مش أفضل طريقة للتواصل. ده أسلوب مايعجبش حد. ولو انت اتعرضت لموقف مماثل ضروري تدافع عن نفسك بالمنطق والعقل.

2- "عارف بقى حصل معايا إيه؟"

من أسوأ طرق التواصل هي التأكيد على الاختلافات بينك وبين شخص بتكلمه (سواء لسه متقابلين أو تعرفوا بعض من زمان). مهم جدًا إنك تركز على الحاجات اللي بتجمعكوا. لو حد بيكلمك في موضوع مهم بالنسبة له، بس انت شايفه عادي. بلاش تحول الانتباه لنفسك بسؤال "عارف بقى حصل معايا إيه؟". لإن دي جملة بتقلل من مشاعر الشخص وقيمته، وتبين عدم اهتمامك به.

3- "أنا عمري ما اشتري حاجة زي دي"

الرد بشكل حاسم أوي وقاطع وقت الاختلاف في الرأي، عمره ما كان طريقة مناسبة لكسب الأصدقاء. لو حد سألك مثلًا عن لبس جديد اشتراه ورديت بالشكل ده، أكيد هتضايق حتى لو مابينش ده وقتها. والردود اللي زي دي بتبين الشخص مغرور أكتر من اللازم، ودايمًا شايف نفسه أفضل من غيره.

4- "أنا عارف مصلحتك"

من أخطر أساليب التلاعب، لما حد يبين إن كلامه جي من منطق حب واهتمام. صحيح الناس دي بيسيبوا انطباع إيجابي، إنهم عايزين التانيين يكونوا كويسين. لكن في الحقيقة هم بيزرعوا فيهم كمية كبيرة من الخوف والمشاكل النفسية.

5- "كنت عارف إن ده هيحصل"

ماحدش بيحب يتعامل مع الشخص، اللي دايمًا بيتصرف كأنه أذكى وأفضل منه. التعالي عمره ما يبني صداقات قوية وطويلة الأمد. لو حد وقع في مشكلة ولجألك، حاول تفكر معاه في حل ليها. مفيش داعي تبين إنك كنت عارف إن كل ده هيحصل.