انت بارد أوي على فكرة.. جملة ممكن تكون سمعتها بتتقال لحد، أو اتقالت لك انت شخصيًا. اللي بيقولها بيكون قاصد يضايقك، لكن في الحقيقة البرود ده حاجة حلوة جدًا. لو يعرف قيمتها اللي بيقولها، هيتمنى يكون هو كمان بارد.
هتسأل ليه؟ تعالى نقولك على 5 مميزات بيتمتع بيهم الشخص البارد، أكتر من أي حد:
1- صحتك في أحسن حال
أكيد هتحافظ على صحتك، ودي أهم حاجة في حياتك. هم اللي اتعصبوا خدوا إيه غير حرق الدم والأمراض. أي موقف يضايق تتعرض له، هيمر بسلاسة لو اتصرفت بهدوء. وصلت شغلك متأخر، أو طلبت أرودر وجالك غلط، إلخ.. وكده كده العصبية مش هتغيره مهما اتنرفزت. يبقى خليك بارد صحتك بالدنيا.
2- تفكير أفضل
بالبرود هتقدر تفكر في أي موقف أو أي حاجة انت عايزها. وتديها حقها في الوقت، فالبتالي هتقدر تاخد أفضل قرار. إنما السربعة مابيجيش من وراها غير الندامة. يعني خليك ع الهادي يا زبادي.
3- مستقر نفسيًا
طول ما النفسية مرتاحة، فانت في السليم. مش مضغوط مش متوتر طول الوقت. عارف تمارس حياتك بشكل طبيعي. والسلام النفسي ده وش مش هييجي، غير لو كنت بارد.
4- هتعرف تستمتع بحياتك
مفيش حاجة في حياتك تستاهل تضايق عشانها، فأكيد هتعرف تستمتع بحياتك أكتر من أي حد. هتعرف تخرج، تسافر، تنمي هوايتك، تشتغل على مشروعك الخاص، أو تعمل أي حاجة. إحنا بنعيش حياتنا مرة واحدة، يبقى نعيشها صح.
5- مشاكلك أقل
في الوقت اللي الدنيا فيه ممكن تبقى والعة حواليك، هتبقى انت برنس وماعندكش أي مشاكل. عارف ليه؟ علشان كل مشكلة لها حل، والحل السليم بييجي بالتفكير السليم. وإحنا كده كده متفقين فوق إن هتفكر بشكل أفضل، مقدمات بتأدي لنتايجك.. معروفة.
