بسبب أزمة كورونا اللي بنمر بيها، بقينا متوترين أغلب الوقت ومش عارفين ننام. وزي ما الإجراءات الوقائية مهمة لصحتنا، النوم كمان ضروري علشان جسمنا يقدر يقاوم الفيروس.
فتعالوم نقول لكم على أهم النصايح لنوم سليم في زمن الكورونا:
1- حافظ على روتين يومك العادي
ناس كتير وإحنا منهم، الأزمة أثرت عليهم بشكل كبير. اللي بيحاول يظبط شغله من البيت واللي مشغول بالأطفال.. إلخ. لكن ضروري جدًا مهما حصل، إننا نحافظ على الروتين اليومي المعتاد. ومانغيرش فيه أي مواعيد أو مهام، علشان نقدر نحافظ على النوم بشكل صحي. يعني حاول تصحى في نفس مواعيدك، وخصص مكان أو مكتب للشغل من البيت، حافظ على مواعيد الوجبات. كل الأمور المعتادة لازم تكون زي ما هي، علشان النوم مايتأثرش.
2- ابعد عن تعسيلة نص اليوم
حاول على قد ما تقدر تتجنب تعسيلة نص اليوم "القيلولة". صحيح ده هيكون صعب في الأول، خاصة إنك بتشتغل من البيت جنب الكنبة أو السرير، لكن مع الوقت هتتعود. ده مايقلش أهمية عن روتينك اليومي اللي لازم تحافظ عليه، لأن النوم في نص اليوم أو من وقت للتاني، هيخليك نعسان ومش فايق طول النهار.
3- العب رياضة (بس مش قبل النوم)
طبعًا النوادي وصالت الجيم مقفولة، لكن لازم نخصص وقت للرياضة في البيت. ممارسة الرياضة بشكل يومي مهمة جدًا للصحة عمومًا، وبتحسن النوم بشكل كبير. بس بلاش يكون التمرين قبل النوم. لإن المجهود البدني اللي هتقوم بيه هيحفز جسمك، ويخلي النوم صعب.
4- قلل تعرضك اليومي للأخبار
ماننكرش إن أخبار فيروس كورونا محاوطانا في كل مكان، على كل وسائل الإعلام والسوشيال ميديا. لكن التعرض للأخبار دي باستمرار على مدار اليوم، بيزود القلق ويأثر على جودة النوم. فضروري نقلل التعرض للأخبار دي من كل الوسائل. ونحدد الوقت والفترة اللي نتابعها فيهم خلال اليوم. يعني مثلًا ممكن ساعة في نص اليوم، نعرف فيها كل الجديد والتطورات ونكتفي بده. بالتالي هيقل إنشغالنا الزايد عن حده، ونقدر ننام بشكل أفضل.
5- ابعد عن شاشات الإلكترونيات قبل النوم
صحيح الإقبال على مشاهدة التليفزيون أو استخدام الإنترنت، زاد بنسبة كبيرة خلال فترة الحظر. لكن لازم ناخد بالنا إن الضوء الأزرق الخارج من الشاشات (خاصة الموبايلا)، بيأثر على دورة النوم وبيسبب صداع. فلازم نبعد عن كل الشاشات قبل النوم، على الأقل بساعة. ونبدلها بحاجة مفيدة زي قراية كتاب أو سماع شوية موسيقى.
