بدأت امتحانات الثانوية العامة، ودي أكتر فترة بيسيطر فيها التوتر على الطلاب. ومش بس الطلاب، دي أسرهم كلها بتكون عايشة في قلق طول الفترة دي. التوتر ده طبعًا ممكن يأثر على تركيز الطلبة، وأدائهم في المذاكرة والامتحانات. وعلشان تعدي الفترة دي على خير من غير قلق، جمعنا لكم أهم النصايح اللي تساعدكم تعدوا منها بسلام:

1- اتباع نظام غذائي صحي

لازم الطالب خلال فترة الامتحانات ياكل أكل صحي، يكون غني بالعناصر الغذائية اللي بتزود التركيز والانتباه. ده هيساعده بشكل كبير في المذاكرة وتحصيل الدروس. يُفضل تقسيم الأكل لـ 5 وجبات مع تقليل الكميات. وكل وجبة تشمل الخضروات، الفواكه الطازجة، الحبوب الكاملة، والمكسرات. ده بجانب شرب كميات كبيرة من المياه على مدار اليوم. لإنها بتنشط الدورة الدموية، وبتساعد على تدفق الدم المحمل بالأكسجين لأعضاء الجسم، خاصة المخ.

 

2- النوم الجيد 

النوم مهم جدًا لتعزيز قدرة الطلاب على تحصيل المعلومات ومراجعتها. فضروري أخذ القسط الكافي من النوم، واللي بيتراوح من 6 لـ 8 ساعات يوميًا. كمان لازم النوم يكون بالليل، علشان اليوم مايتقلبش. وفي حالة الإحساس بالإرهاق، ممكن أخذ قيلولة في نص اليوم.

 

3- ممارسة الرياضة وتمارين التنفس

التمارين الرياضية من الطرق الفعالة اللي بتقلل شعور التوتر والقلق عند الطلاب. واللي بييجي نتيجة المذاكرة لساعات طويلة. فيُفضل الحفاظ عليها طوال الأسبوع ولو لوقت صغير. كمان تمارين التنفس والاسترخاء زي اليوجا، بتقلل الشعور بالتوتر والخوف. والحفاظ عليها بيسهل حصول الجسم على الأكسجين بقدر كافي، فيقدر يقوم بالوظائف الحيوية بشكل سليم.

 

4- تنظيم الوقت 

يعتبر أهم وأقوى العوامل اللي بتساعد على إنجاز المهام المطلوبة، من غير الإحساس بالضغط والتوتر. علشان كده ضروري جدًا عمل خطة مذاكرة، بتشمل فترات الراحة والتسلية. ممكن تكون فيها المذاكرة لمدة 50 دقيقة، و5 أو 10 دقايق بريك. الطريقة دي بتزود القدرة على استيعاب المعلومات بشكل أفضل. وبتمكن الطالب من استغلال كل وقته بنجاح.

 

5- تقليل المنبهات

خلال فترات الامتحانات والمذاكرة، بيلجأ الطلاب لشرب كميات كبيرة من المنبهات زي الشاي والقهوة والنسكافيه. لاحتوائها على نسبة عالية من الكافيين، اللي بيساعدهم على السهر لساعات طول الليل. لكن الإفراط في المشروبات دي بيضر الصحة الجسدية والنفسية. وبيزود خطر الإصابة باضطرابات الجهاز الهضمي. ده غير الشعور بالأرق وعدم انتظام النوم. ويُفضل استبدالها بالمياه والعصائر الطبيعية.