مفيش حد مايتمناش يبقى غني ولو بدرجة بسيطة. دايمًا بتستهوينا فكرة الثراء، وإزاي الأغنيا بيعيشوا حياتهم بشكل مختلف. لكن في الحقيقة الأشخاص الأغنيا هم ناس عادية جدًا، مايختلفوش عننا غير في طريقة التفكير. دايمًا بيفكروا إزاي يستثمروا في المكسب 24 ساعة، ومش شرط بمجهود كبير. علشان كده تعالوا نقول لكم على 6 حاجات الأغنيا بيعملوها بشكل مختلف، حسب ما نشر "برايت سايد":
1- مابيضيعوش فلوس على الماركات
مارك زوكربيرج مؤسس فيسبوك، تقريبًا بيلبس نفس التي شيرت الرمادي يوميًا. وبرر ده بإنه بيفضل يخلي تركيزه على تحقيق الأهداف العالمية، وتقديم أفضل خدمة ومنتجات في مجاله عمله.
كمان الملياردير بيل جيتس، ثاني أغنى رجل في العالم، بيفضل الأشياء الرخيصة. على سبيل المثال بيلبس ساعة ماركة "Casio"، تمنها حوالي 24 دولار. ودايمًا بيتكلم عن تمن إكسسواراته بكل مرح.
2- بياكلوا طعام صحي
نسبة كبيرة من الأغنياء بيتبعوا أنظمة غذائية ثابتة ومحددة في حياتهم. بيلتزموا بنصائح خبراء التغذية في الأكل، ودايمًا بيتبعوا الأنظمة اللي بتوفر أكبر قدر من الطاقة، علشان يستغلوها سواء في الشغل أو الترفيه.
3- بيكتبوا قائمة يومية بالأولويات
من أهم العادات اللي بتميز الأغنيا، إنهم دايما محددين مهام كل يوم وعاملين قائمة بالمطلوب إنجازه بالتحديد. وده موجود بنسبة 81% في الأغنيا مقابل 19% بس للناس العادية. وبيحاولوا إنهم ينجزوا على الأقل 80% من المهام، وفي نهاية اليوم يحصروا النتايج اللي حققوها.
4- بيحددوا مواعيد شغلهم
عدم الشغل بالليل مايقلش أهمية عن الشغل الجاد طول النهار. اليوم من بعد 6 مساءً دايمًا بيكون لهم لوحدهم، بعيدًا عن مكالمات الشغل والإيميلات. زي ما بيخلصوا لوقت شغلهم، بيخلصوا تمامًا لوقت الفراغ والتسلية.
5- بيستثمروا في العلاقات
دايمًا بيحافظوا على التواصل مع ناس تانية من نفس مجالهم، وعلى نفس مستوى النجاح. التواصل ده ومشاركة الخبرات بيفيد في التعلم أكتر، وبيساعد الواحد يتجنب أخطاء غيره وقع فيها.
6- بيتابعوا الأخبار
"وارين بافيت" خامس أغنى رجل في العالم، بيحب يتابع الأخبار. وبيقرأ حوالي 6 صحف في اليوم. متابعة الأخبار بيساعد في الحصول على معلومات وتكوين الآراء، اللي بتساعد دايمًا في اتخاذ القرارت الصائبة.
يا ترى انت بتعمل إيه من عادات الأغنيا
