جهاز المناعة هو خط الدفاع الأول عن أجهزة الجسم ضد أي فيروس. وضروري في ظل انتشار فيروس كورونا اليومين دول، إننا نحافظ عليه ونقويه على قد ما نقدر. علشان كده جمعانالكم أهم 6 عادات يومية بتقوي المناعة ضد أي فيروس، حسب ما نشر "أخبار اليوم":
1- تناوُل الخضروات
مهم جدًا تناول الخضار الني كل يوم، لإنه بيحتوي على بكتريا عضوية بتساعد على تقوية جهاز المناعة. واللي بدوره بيواجه أي فيروس داخل الجسم.
2- التعرض للشمس
من أهم أسباب انتشار الأنفلونزا في الشتا، هو إن الفيروس بينتقل بسرعة في درجات الحرارة المنخفضة. علشان كده يفضل نقضي وقت تحت أشعة الشمس، لأنها بتمد الجسم بفيتامين "د". وبتخلي الخلايا المكافحة للأمراض في الجلد بتتحرك أسرع وبكفاءة أعلى.
3- شاور ساقع الصبح
معظم الأبحاث الطبية أكدت إن شاور الصبح الساقع، بيساعد على تقوية مناعة الجسم ومحاربة الفيروسات.
4- تنظيم النوم
تنظم ساعات النوم بالليل والاستيقاظ في ميعاد ثابت صباحًا، بيساعد بشكل كبير في تقوية المناعة. وكمان بيساهم في عمل أجهزة الجسم بشكل صحي وأكتر وسلامة.
5- تناول الزبادي باستمرار
بكتيريا الزبادي النشطة اللي بتنطلق في القناة المعوية، تعتبر مضادات حيوية طبيعية واسعة المجال. وبتساعد على تقوية المناعة بشكل كبير. علشان كده يُفضل تناولها كل يوم الصبح بانتظام.
6- شوربة الفراخ
شوربة الفراخ مفيدة جدًا للتخلص من التهاب المفاصل. وكمان بتقوي المناعة وبتحارب الفيروسات.
