اختيار كريم واقي الشمس المناسب لنوع البشرة، خطوة متقلش أهمية عن طريقة وضعه على بشرتنا، لإنها بتفرق جدًا في فعاليته وحمايته، وأي غلطة في الخطوتين دول ممكن تضر بشرتنا وإحنا مش عارفين بدل حمايتها. 

فا يالا نعرف إيه الأخطاء الشائعة في استخدام الصن بلوك علشان نتجنبها:

1-بنهتم بس بعامل الوقاية ونهمل باقي المكونات

أول حاجة عنينا بتيجي عليها وإحنا بنشتري الصن بلوك، هي عامل الوقاية، بس الحقيقة إن كل ما كان كريم الشمس بيحتوي على ثاني أكسيد التيتانيوم أو أكسيد الزنك، كل ما منع أشعة  الشمس الخطيرة من اختراق البشرة.

2-استخدام واقي شمس بمؤشر حماية قليل

ضروري جدًا نتختار كريم شمس للبشرة بمعامل حماية مش أقل من 50، والأهم كمان نعرف إن كريمات واقي الشمس المخصصة للبشرة، ماينفعش نستخدمها لباقي الجسم. شوفوا رقم (6)

3-عدم وضع كمية مناسبة 

في ناس متعرفش كمية الكريم المظبوطة اللي المفروض نحطها على بشرتنا، فا بيعملوا حاجة من اتنين بيقوموا بوضع كمية قليلة جدًا، أو بيزودوا كريم كتير، لكن علشان تحمي وجهك كويس، فا أنت محتاج تحط كريم على إصبعين بطريقة متساوية.

4-مابنوزعش الكريم على الوجه كله

معظم الكريمات بيكون مكتوب عليها عدم وضعه تحت العين أو الشفايف، لكن الصن بلوك مصمم لحماية البشرة كلها، فا متقلقوش مش هيضر الأماكن دي بالعكس.

5-بنكسل  نحط الصن بلوك قبل الخروج من البيت 

علشان البشرة تمتص مكونات الصن بلوك كويس، لازم يتم وضعه قبل الخروج من البيت بـ 30 دقيقة، سواء كنت رايح البحر أو أي مشوار تاني.

6-استخدام نفس الكريم للوجه والجسم

كتير من منتجات البشرة بتختلف مكوناتها عن المنتجات المخصصة للجسم، ده اللي حاصل في كريمات الشمس بتاعت الجسم، واللي عامل الحماية فيها بيكون قليل حوالي 30، فا ضروري نختار المنتج المناسب للمكان المناسب.

7-تجاهل تاريخ الصلاحية

أخطر حاجة تعملها في حق بشرتك، هو استخدام صن بلوك قديم، بكده تعرض جلدك للضرر ومع أشعة الشمس ممكن تصاب بتصبغات والتهابات أنت في غنى عنها، علشان  كده ركز مع تاريخ صلاحية المنتج من بداية استعماله.