صحيح الروتين ممل ورخم، سواء شغل أو مشاوير أو أي حاجة معتادة بتعملها من انت مش حاببها. لكن الغريب إن في روتين بنعمله باستمرار، من غيره اليوم مايعديش. حاجات كده لو ركزت هتلاقي نفسك بتكررها كل يوم، ومع ذلك حاببها. أو على الأقل مش مضايقاك. تعالوا نشوف إيه الحاجات دي:

1- النوم بعد المنبه

إنك تنام براحتك يوم الأجازة كوم، وإنك تنام بعد المنبه في يوم شغل كوم تاني خالص. الموضوع كده له طعم خاص، انبساط وراحة نفسية غريبة بتحصل. وغالبًا شوية النوم دول بيبسطوا أكتر من الكام ساعة اللي كنت نايمهم أساسًا.

2- النسكافيه الصباحي

مج النسكافية المتين بتاع الصبح، بتقف عليه قرارت اليوم كله. أه ما هو من غيره هتلاقي نفسك متنح مش فاهم حاجة، وماشي بتغني "أنا مش عارفني أنا توهت مني أنا مش أنا".

3- قرارت الدش المصيرية

دش الصبح ده انت مش بتاخده علشان تفوق بس. ده بتراجع فيه أهم قرارات حياتك، وتسأل نفسك أسئلة وجودية خطيرة. فكست للشغل إمبارح ليه؟ طب لما أروح الشغل النهارده هقول لها إني بحبها. صحيح هو كيف بدأ الخلق؟ إيه ده هو السخان مش شغال؟

4- أنا عايز أستقيل

من أكتر القرارت اللي بتطاردك أول لما بتصحى من النوم، إن ماكنش ملازمك طول حياتك أصلًا. خصوصًا بقى لو هتقوم من تحت البطانية والجو برد. وبعد ما بيجي في بالك شكل حياتك البائسة من غير شغل، وإنك قد إيه محتاجه. أوتوماتيك بتلاقي نفسك في الحمام ماتعرفش إزاي.

5- فطار الشغل

هنفطر إيه النهاردة؟ ده سؤال بتسأله أو بتسمعه كل يوم في الشغل. هتشتغل يعني على معدة فاضية؟ بعدها بتيجي فقرة الحيرة، لحد ما تقرروا تاكلوا نفس اللي بتاكلوه كل يوم.

6- نتفليكس آند تشيل

ماينفعش اليوم يعدي من غير جرعة نتفليكس المعتادة. كده كده في مسلسل بتتابعه، مسلسل أو فيلم جديد هتشوفه. ده غير برامج تانية كتيرة ومختلفة. طول ما عندك نتفليكس، أكيد يومك مش هيكمل غير بيها.

7- فقرة الموبايل قبل النوم

لازم تمسك الموبايل قبل ما تنام وتقلب فيه. أي سكرين شوت خدتها هتشوفها، أي بوست هتعمله save ومش هتشوفه تاني، كومنت على فيسبوك هنا، لايك على إنستجرام هناك. يعني شوية تضييع وقت كده قبل النوم.