سواء اتنين بيحبوا بعض أو زوجين، مفيش علاقة خالية من المشاكل. وزي ما بيقولوا كده هي الملح والتوابل في أي أكلة. لكن في وجود التواصل والاحترام والثقة، بتفضل العلاقة مستمرة وبقوة. علشان كده هنقولكم على 7 علامات، تبين إنك في علاقة صحية قوية ومستمرة:

1- مابتخافش تكون على طبيعتك

في نوعين من العلاقات، مصطنعة وطبيعية. في العلاقة المصطنعة، كل طرف بيحاول يبان كإنه ملاك من السما. ودي بتكون وقتية وعمرها قصير. لكن في العلاقة الطبيعية كل طرف بيتصرف بأريحية، وبيكون على طبيعته. لأنه عارف إن شريكه فاهمه ومتقبله زي ما هو. ودي بتكون علاقة ناجحة.

2- بتشارك معاه تفاصيل يومك

بعد يوم شغل طويل وممل، بتحكي لشريكك مشاكلك مهما كان نوعها. وترغي في أتفه التفاصيل. النوع ده من الكلام بيقوي الثقة والتناغم بين الطرفين. واللي بدوره بيقوي العلاقة.

3- بتتكلم براحتك عن علاقاتك السابقة

بتتكلم معاه بكل أريحية عن علاقاتك السابقة، وخاصة اللي كانت متعبة بالنسبالك. وهو بدوره بيتفهم ده، وبيقدر يفصل بين ماضيك والحاضر بتاعك. ده بيزود مستوى الثقة بينكم. لكن دايمًا افتكر إنك ماتكونش صريح بالدرجة اللي تجرح بيها مشاعره.

4- عارفين باسووردات بعض

الموضوع ده بيحتاج وقت طويل علشان يتم، لأنه مش سهل. لكن طالما وصلتوا للمستوى ده  من الأمان، زي مشاركة حساب بنكي واحد، أو معرفة الرقم السري للكريت كارد  مابينكم. فده علامة كبيرة على نجاح العلاقة وقوتها.

5- مش مهووسين بالسيطرة

مشاكل الثقة بتدمر أي علاقة، خاصة لو في طرف مهووس بالتحكم  والسيطرة على التاني. لكن لو كل واحد واثق في أفعال التاني، ده أكبر دليل على علاقة صحية، وثقة كل طرف في نفسه.

6- مفيش قلق من حسابات السوشيال ميديا

أكاونت فيسبوك أو إنستجرام، ممكن يكون بداية مشاكل كبيرة. واللي دايمًا بتبدأ بالغيرة. لكن لو كل طرف ماعندوش أي مشاكل، إن التاني يشوفه حساباته، فدي مرحلة مش أي حد بيوصل لها. ودي نقطة مهمة جدًا، لأن مفيش حد عنده حاجة يخبيها.

7- بتعترفوا بالغلط وتشاركوا المسؤلية

المشاركة بين الطرفين مش بس بتكون في أنشطة معينة، زي احتياجات البيت أو الشغل. المشاركة بتكون في المشاعر بين الاتنين. وكمان الاعتراف بالغلط وتحمل المسئولية، ده من أقوى الروابط بين الطرفين. بدل ما كل واحد يرميها على التاني.