كتير مننا مش بيتشرب مياه بالقدر الكافي، وبيشرب بدالها بشاي وقهوة كتير أو مياه غازية. لكن الدراسات كلها بتأكد إن مفيش أي سوائل تقدر تعوض احتياج الجسم للمياه. اللي بتمثل نسبة كبيرة من أعضاء جسم الإنسان. وزيادة استهلاك السوائل التانية، بيضر الجسم على المدى الطويل.

نقص كمية المياه في جسمك له علامات مختلفة. أول ما تلاحظها لازم تعرف إن في مشكلة.. تعالوا نتعرف عليها:

- جفاف الفم

بعد ساعات طويلة من عدم شرب المياه، بيبدأ الفم يحصله جفاف. وحتى لو عوضت ده بشرب العصائر، هتكون مجرد حل مؤقت. ده لإن شرب المياه له تأثير وفوائد مختلفة على رطوبة الفم والحلق.

 

- جفاف البشرة

بشرتك هي أكبر عضو في جسمك، وبالتالي فهي بتحتاج للحفاظ على رطوبتها طول الوقت. لو حسيت إن بشرتك جافة، فدي علامة من علامات جفاف الجسم. وده ممكن يسببك مشاكل أكبر بكتير، انت في غنى عنها.

 

- نقص العرق

لو إنت من النوع اللي مش بيعرق كتير، لازم تنتبه. لإن ده معناه إن جسمك مش قادر يتخلص من الأوساخ والزيوت المتراكمة طوال اليوم. إذا كنت عايز تتجنب كل ده، زود كمية المياه اللي بتشربها في يومك.

 

- ألم المفاصل

الغضاريف والعمود الفقري بيتكونوا من حوالي 80 ٪ من المياه، علشان تمنع عظامنا من الاحتكاك ببعضها. بالتالي لو بتحس بألم متكررة في مفاصلك، فده دليل قوي إنها مش بتقوم بوظيفتها على أكمل وجه، نتيجه قلة شرب المياه.

 

- انخفاض الكتلة العضلية

عضلاتك بتتكون من المياه، وكل ما قللت شرب المياه كل ما كانت كتلك العضلية قليلة. والدراسات بتأكد إن شرب المياه قبل وأثناءه وبعد التمرين، بيحسسك بالراحة. وكمان هتتوزع بشكل كويس في جسمك، وتقلل تشنجات العضلات.

 

- الشعور المستمر بالإرهاق

قلة شرب المياه بيسبب انخفاض ضغط الدم، وبالتالي الأكسجين مش بيوصل كويس للمخ. فمعدل ضربات القلب بيزيد. وكل ده بيحسسك بالتعب من غير ما تقوم بأي مجهود.

 

- الإمساك

المعدة والجهاز الهضمي بيحتاجوا كمية كبيرة من السوائل، علشان يقوموا بوظيفتهم بسهولة. فإذا كنت بتعاني من الإمساك، ده معناه إن أعضاء جسمك الداخلية بتعاني من الجفاف. وحلها إنك تشرب مياه مش أي سوائل تانية.