الشوبينج إدمان، والدراسات أكدت الكلام ده. الواحد بيحس براحة نفسية ومزاجه بيبقى زي الفل، لما ينزل تشتري له كام طقم كده لزوم الروشنة. بس طبعًا بيرجع مفلس معهوش مليم. ماهو صحيح الشوبينج إدمان، بس بيخليك على الحديدة. وعلشان ميبقاش موت وخراب ديار، هنقول لكم إزاي توفروا الفلوس وانتو بتعملوا الشوبينج اللذيذ.

1- كُل قبل ما تنزل

لو نازل تعمل شوبينج، لازم تاكل كويس في البيت. لإنك أول ما تدخل المول هتشم روايح الأكل من كل نوع، وتحس إنك جعان وعمرك ما شوفت أكل في حياتك. فتاخد أول ضربة في محفظتك، وترجع تغني ظلموه. لكن مفيش مانع تشرب لك فنجان قهوة كده يظبط المزاج.

2- بلاش تشتري من مكان واحد

الأسعار دايمًا بتختلف من مكان للتاني. وأكتر ناس بتقع في غلطة السعر الغالي، هم اللي دايمًا بيشتروا من مكان واحد. علشان كده لازم تروح كزا مكان وتعرف الأسعار، وتختار اللي يناسبك من كل مكان بأحسن سعر.

3- ماتجريش ورا الموضة

مش أي موضة أو تريند يظهر، يناسبك. سواء لبس أو إكسسوارات أو غيرهم. شوف انت بترتاح في إيه واشتريه، وسيب اللي بيلبس على التريند براحته. بلاش تضيع فلوسك على حاجة هتتلبس مرة وتترمي. بس ده مايمنعش إنك تجرب التغيير، لكن في المعقول.

4- بلاش مبدأ "يمكن احتاجها"

اشتري دايمًا اللبس أو المتطلبات الضرورية بس. بلاش تشتري حاجات تانية لفتت نظرك، لمجرد إنك ممكن تحتاجها بعدين. ركز على الضروري والمهم، وأي حاجة تانية خليها لوقتك تكون انت محتاجها فيه، هي مش هتطير.

5- استغل التخفيضات

في نهاية كل موسم، المحلات بتعمل تخفيضات على كل أو أغلب اللبس المعروض. دي فرصة كويسة جدًا تشتري فيها اللي انت محتاجه، وبأقل سعر. خاصة لبس الشتا اللي سعره بقى عبارة عن رقم تليفون صاحبك.

6- حدد احتياجاتك وحدد ميزانيتك

يُفضل تكون نازل وانت محدد عايز إيه، وعارف حدود ميزانيتك كام. لإن غير كده انت ممكن تشتري أي حاجة تقابلك، حتى لو مش محتاجها. وتحديد الميزانية هيساعدك برضو توفر، لإنك لو سبتها مفتوحة هتحصل نفس النتيجة. تلاقي نفسك ضيعت فلوسك على الفاضي. ويستحسن تكون معاك الفلوس كاش، لإن الكريدت كارد هيخليك تنسى نفسك في الشراء.

7- ماتتخدعش في الخصومات

في محلات بترفع سعر المنتجات أو اللبس لفترة معينة، لحد ما السعر يستقر في أذهان الزباين الدائمين. بعدها يعملوا تخفيض بنسبة معينة، ويحطوا السعر القديم تاني. وللأسف الناس بتقع في الفخ ده وتشتري بالسعر العالي. علشان كده لازم تاخد بالك كويس من الأسعار، خاصة لو مكان بتتردد عليه كتير.