"السوبيا" واحدة من أهم المشروبات الموجودة على سفرة رمضان، وبتعتبر المشروب المفضل لناس كتير على الإفطار، ولو ماتعرفش بتتكون من إيه، فهي عبارة عن ميكس "لبن- جوز هند- فانيليا- مسكرات- نشا- سكر".

وبما إن الإقبال عليها بيكون تاريخي طول رمضان، إحنا هنقولك خلاصة تقرير نشره موقع "الكونسلتو" عن فوائدها وأضرارها.

فوائد السوبيا:

1- بترطب الجسم خلال الصيام، وبتقلل الشعور بالعطش.

2- بتقوي جهاز المناعة، وبتساعد على تنشيط الدورة الدموية وضبط ضغط الدم، وخفض مستويات الكوليسترول الضار في الجسم.

3- بتحتوي على نسبة عالية من الألياف، اللي بتحسن حركة الأمعاء وتسهيل عملية الهضم والإخراج.

4- بتحمي من الإصابة بأمراض القلب والأوعية الدموية، لغناها بمعدن الماغنسيوم.

5- بتساعد على تقوية العظام، وبتخفف ألم المفاصل وبتقلل التورم، لاحتوائها على أحماض أوميجا 3 واللبن.

أضرار السوبيا:

1- شرب السوبيا بكميات كبيرة، بيزود الوزن وبيعزز فرص الإصابة بالسمنة المفرطة، بسبب السكر الموجود فيها.

2- بترفع نسبة السكر في الدم، علشان كده ضروري مرضى السكر يستشيروا الطبيب إذا كان مسموح ليهم بشرب السوبيا أو لا.

3- الأشخاص اللي بيعانوا من حساسية اللاكتوز والفول السوداني، معرضين للطفح الجلدي والحكة وتقلصات المعدة وضيق التنفس.