المشروبات الطبيعية والأعشاب، بتلعب دور كبير في علاج أمراض كتير، وبما إننا في الشتاء فطبعًا الليمون بيكون له الأولوية من بين مشروبات كتير، لإنه مصدر طبيعي غني بفيتامين "سي"، اللي بيقوم بتقوية الجهاز المناعي ضد نزلات البرد والإنفلونزا اللي أعراضها بتشبه أعراض فيروس "كورونا" المستجد (كوفيد 19) بشكل ما.

لكن كتير مننا اتعود يشرب الليمون الساخن من الشتاء، بحجة إن ده بيزود فاعليته في مقاومة الأمراض، لكن الحقيقة إن العكس هو الصحيح، وده كلام الأطباء المتخصصين، ومنهم الدكتور هاني الناظر، الرئيس الأسبق للمركز القومي للبحوث، واللي أكد إن مافيش أي فائدة بتعود على الصحة العامة من تناول عصير الليمون الساخن في فصل الشتاء، حتى لو شربت منه كميات كبيرة.

وبحسب الدكتور هاني الناظر تسخين الليمون بيؤدي لانخفاض تركيز فيتامين "سي" لإنه ما بيتحملش درجات الحرارة العالية، وبالتالي بيكون عصير الليمون بلا قيمة صحية.

ونصح كمان بضرورة تناول عصير الليمون بارد، مع مراعاة عدم تعريضه لدرجة حرارة عالية، بالإضافة لعدم إضافته على المشروبات الساخنة، لضمان الاستفادة من فيتامين "سي" اللي فيه ودوره القوي في تقوية مناعة الجسم وتقليل فرص الإصابة بالأمراض المعدية، ومنها فيروس "كورونا" المستجد.

مستني إيه؟ قوم جهز كوب من عصير الليمون البارد فورًا.