مانقدرش ننكر طعامة حلويات رمضان خصوصًا الكنافة والقطايف، لكن الأكيد كمان إنها مليانة سعرارات حرارية وسكريات ودهون، وبتسبب أمراض كتير إحنا في غنى عنها، وللأسف ناس كتير بتكتر منها في الفترة بين الفطار والسحور وكأنها سناكس. وعلشان تحمي نفسك من أضرارها استبدلها بأطعمة صحية، هنقولك عليها في السطور الجاية:

1- المكسرات

بتحتوي على نسبة عالية من أحماض أوميجا 3، اللي بتقلل فرص الإصابة بأمراض القلب، بجانب الألياف اللي بتسد الشهية وبتسهل الهضم والإخراج وبتتحكم في مستويات السكر بالدم. وعلشان تستفيد منها صح، ماتزودش عن 28 جرام، يعني قد قبضة الأيد، وابعد عن الأنواع المملحة، لأنها بترفع ضغط الدم وتبحبس السوائل في الجسم.

2- زبادي بالفواكه

الزبادي بيقلل الشعور بالعطش وقت الصيام، لاحتوائه على مادة البروبيوتيك، ودي بتحافظ على التوازن البكتيري في الأمعاء، بالإضافة إلى غناه بالبروتين والكالسيوم والبوتاسيوم. ويفضل تناول الزبادي مع الفواكه الفريش، لانها بتحتوي على سكريات صحية.

3- الشوكولاتة الداكنة

من الحلويات الصحية لجسم الإنسان في رمضان، والسبب هو محتواها العالي من الكاكاو، اللي بيشكل 70% من قيمتها الغذائية، وده بيساعد على خفض الضغط المرتفع،ال وتقليل فرص الإصابة بأمراض القلب والأوعية الدموية.

4- التفاح

غني بالألياف المفيدة لصحة الجهاز الهضمي، وكمان بيحتوي على نسبة عالية من مضادات الأكسدة. وممكن تضيف ملعقة عسل على شرائح تفاح طازجة، علشان يضيف ليها طعم مميز ويرفع قيمتها الغذائية.

5- الكنتالوب

ممكن نعتبر الكنتالوب بديل صحي للحلويات الرمضانية، لأن السكريات الموجود فيه من النوع الصحي، بالإضافة لأن 100 جرام منه بيمد الجسم بجرعة عالية من فيتامين سي وفيتامين أ والبوتاسيوم ومضادات الأكسدة.