البيض من أهم الأطعمة اللي ممكن تدخل في الوجبات التلاتة "فطار- غذاء- عشاء"، مش بس علشان طعمه لذيذ وبيمنحنا الإحساس بالشبع، لكنه كمان مفيد جدًا لجسمنا، وبعد ارتفاع أسعاره متوقع إن بعض الناس مش هتقبل على شرائه إلى حد ما، علشان كده جمعنا لكم أطعمة ممكن تاكلوها بدل البيض هتمدكم بنفس القيمة الغذائية الموجودة فيه وسعرها أرخص، وده بحسب تقرير علمي حديث نشره موقع "الكونسلتو".
اللب الأبيض
بتحتوي بذور قرع العسل أو اللب الأبيض الخالي من الملح، على عناصر مهمة زي: "الزنك والفسفور"، وبيوفر كل 30 جرام لب أبيض حوالي 9 جرام بروتين نباتي، ودي نسبة أعلى من نسبة البروتين الموجودة في البيض!
العدس
طبق العدس الأصفر بيحتوي على 14 جرام بروتين، بجانب الألياف والفيتامينات والمعادن التانية، علشان كده ممكن يكون بديل صحي ومفيد عن البيض.
الجبنة القريش
يعتبر كوب الجبن القريش مصدر غني بالبروتين والكالسيوم وفيتامين " B12" والحديد، وكمان السعرات الحرارية الموجودة فيها قليلة جدًا.
اللوبيا
تخيل إن تناول كوب من اللوبيا ممكن يمنحك فوائد البيض! لإنها بتحتوي نسبة عالية من الحديد والبوتاسيوم والألياف والبروتين والماغنسيوم والزنك وفيتامين "K1".
الزبادي
القيمة الغذائية الموجودة في البيض هي نفسها اللي هتلاقيها في كوباية الزبادي، سواء كان كامل الدسم أو خالي من أي إضافات زي السكر والفواكه.
بذر الكتان
ممكن يكون الموضوع ده مش متعودين عليه في نظام أكلنا، لكن تناول ملعقة كبيرة من بذر الكتان المطحون في الفطار أو إضافتها على كوباية مياه دافية أو لبن، هتمد جسمك بنسبة عالية من البروتين والألياف، وكأنك كلت بيضة بالظبط.
