الصيف وصل، ووصلت معاه الفاكهة اللي بيعشقها ناس كتير، ما هو نادرًا لما تلاقي حد مابيحبش المانجا، ويا سلام على كوباية عصير ساقعة تطري على قلبك وتغير موودك في عز الحر، عصير المانجا مش بس طعمه لذيذ، ده كمان مفيد لصحتنا، تعالوا نعرف الفوائد اللي هتخلينا نعشقه بزيادة:

1- لما بنشرب كوباية عصير مانجا، جسمنا بيحصل على العناصر الغذائية دي: 61 جرام بوتاسيوم- 13 جرام صوديوم- 43 جرام كالسيوم- 8 جرام ماغنسيوم- 5 جرام فسفور- 0.9 جرام حديد.

2- بيحتوي عصير المانجا على نسبة عالية من مضادات الأكسدة، اللي بتقلل من خطر الإصابة بالسرطانات.

3- شرب عصير المانجا له دور كبير في تحسين حركة الأمعاء وتسهيل الهضم والإخراج، ولكن المفروض مانكترش منه، علشان مايسببش إمساك وانتفاخ البطن.

4- الأشخاص اللي بيعانوا من الأنيميا، ممكن يشربوا عصير المانجو كعلاج طبيعي، وده لإنه بيحتوي على الحديد، اللي بيساعد على إنتاج هيموجلوبين الدم، واللي بدوره بينقل الأكسجين لكل أجزاء الجسم.

5- عصير المانجا غني بمادة البيتا كاروتين، ودي بيحولها الجسم لـ فيتامين أ، المعروف بقدرته على تقوية النظر، وكمان تقليل الإصابة بأمراض العيون مع تقدم السن.

6- بيساعد عصير المانجا على تقليل خطر الإصابة بأمراض القلب، لإنه بيحتوي معدن البوتاسيوم اللي له فوائد كتير زي: تنظيم ضربات القلب- وتقوية عضلة القلب، وغيرها.

7- بيساهم عصير المانجا في تقوية العظام وحمايتها، لأنه بيحتوي على نسبة عالية من الكالسيوم، اللي بيحميها من الكسور والهشاشة.

وأخيرًا..

ضرري جدًا مانكترش من شرب عصير المانجا، مهما كنا بنحبها، لإن زي ما لها فوائد لها أضرار ومنها : زيادة الوزن، وارتفاع نسبة السكر في الدم.