دايمًا بينصحنا خبراء التغذية والأطباء بالابتعاد عن تناول الـ "فاست فود" الوجبات السريعة، لإنها مليانة بالكوليسترول والسعرات الحرارية والكربوهيدرات والدهون، الأمر اللي بيسبب أمراض خطيرة على المدى البعيد، زي أمراض القلب والسمنة، لكن الخطير هو اللي كشفته دراسة حديثة عن وجود مواد أخطر من كل اللي فات ده وإحنا مش عارفين.
بعد تحليل وفحص عشرات الوجبات السريعة، اكتشف الباحثين مادة اسمها "الفثالات"ودي بيتم استخدامها علشان تخلي البلاستيك مرن، وكمان بتدخل في صناعة منتجات صناعية كتير زي الصابون والشامبو والأكياس البلاستيك، والمادة دي بتسبب مشاكل صحية خطيرة، منها السرطان وتليف الكبد والعقم، بجانب صعوبة التعلم واضطراب الانتباه عند الأطفال.
الوجبات السريعة اللي اختارها الباحثين، كانت من مطاعم وعلامات تجارية مختلفة، وكان معيار اختيارهم هو الوجبات الأكثر مبيعًا من قائمة الوجبات، اللي هي الهامبرجر، البطاطس المقلية، البيتزا بالجبن، الدجاج المقلي، ووجدوا إن الوجبات المصنوعة من اللحوم، بتحتوي على مستويات أعلى من المادة الخطيرة دي بمقارنة بالبطاطس المقلية وبيتزا الجبن.
ورجحت الدراسة، إن المادة دي بتتنقل للأكل من خلال معدات المعالجة والتعبئة والقفازات البلاستيكية اللي بيلبسها الموظفين، خلال عملية تحضير الطعام ونقلة من مكان لمكان.
