لعنة الأكل أكتر من مرة بتصيب الكل في الشتا، وبتزيد تحديدًا آخر الليل. ده لإن الجسم بيكون محتاج للطاقة والدفا، اللي بيلاقيهم في الأكل. هنا بتظهر مشكلة زيادة الوزن، لإن معظم الأكلات فيها سعرارات حرارية عالية. ده غير إن الجسم بيحرق أقل بالليل. وعلشان تستمتعوا بالأكل وتقضوا على الجوع اللارادي في الشتا، جمعنالكم أكلات خفيفة بتشبع من غير ما وزنكم يزيد. اعرفوها في السطور الجاية:
1- سلطة الملفوف (الكرُنب)
مكوناتها بسيطة ومتاحة، زي: الملفوف - جزر - زبادي - مايونيز - خل. واحدة من أكتر السلطات المغذية، والخفيفة في نفس الوقت. الألياف اللي فيها بتساعد على الشعور بالشبع لفترات طويلة.
2- البرتقال
فاكهة الشتا، والمصدر الأساسي لفيتامين سي. غني بالألياف الغذائية والمياه، اللي بتمنح الجسم الإحساس بالشبع. ولإنه من الحمضيات فهو مناسب جدًا للتخلص من جوع آخر الليل.
3- الشوكولاتة الداكنة
لو نفسك في حاجة حلوة تاكلها بالليل، مفيش مانع تاكل شوكولاته. لكن يُفضل تكون داكنة، لإنها بتقفل الشهية وسعراتها الحرارية أقل. بس ماتكترش منها وكل بالعقل.
4- البيض المسلوق
حاول دايمًا يكون موجود على وجبة العشا، خصوصًا في الشتا. لإن البيض المسلوق غني بالبروتين والدهون الصحية. وهتحس بعد أكله إنك مش جعان، وأخدت كفايتك من الأكل.
5- المكسرات
غير إنها مسلية، تعتبر وجبة مفيدة كمان. فلو شيطانك وزك على أكلة بيتزا وانت سهران بالليل، ماتسمعش كلامه وهاتلك شوية مكسرات. بس المهم تكون نية ومش مملحة. والأفضل ماتزودش عن 15 حبة.
