كل بيت له طرقه الخاصة في تخزين اللحوم وطبخها، وللأسف مش كتير يعرفوا إن طريقة تخزين اللحوم ليها دور كبير في تسويتها وطعمها، والموضوع مش مجرد تجميدها في الفريز وبس. علشان كده هنقول لكم على أحسن طرق لتخزين اللحمة، بحسب تقرير نشره مؤخرًا موقع "المصري اليوم":

1-مبدأيًا، ضروري تشتري اللحوم من مكان موثوق فيه، علشان ماتضيعش فلوسك ومجهودك على الفاضي.

2-قطع اللحمة قطع متوسطة، يعني مش كبيرة ولا صغيرة، وبكده هتستوي أسرع ومش هتتحرق منك لو حجمها صغير زيادة عن اللزوم.

3-شيل اللحمة في الفريزر بعد تقطيعها على طول، لإن وجودها في درجة حرارة الغرفة بيعرضها للتلوث، واحتمال كبير تفسد.

4- ضروري مكان تقطيع اللحوم وتوزيعها يكون نظيف ومتعقم، وطبعًا أدوات التقطيع زي السكينة وباقي الأدوات تكون متعقمة، وبكده تكون ضمنت نظافة اللحمة وعدم تعرضها لأي ملوثات ممكن تعرضها للتلف.

5-نوعية الأكياس اللي بيتم حفظ اللحوم فيها مهم جدًا، ضروري الكيس يكون سليم ومش مقطوع ومناسب لقطعة اللحمة اللي متخزنة فيه، علشان يحتفظ بيها لوقت أطول.

وكل عيد وأنتم مبسوطين!