المصريين دايمًا بيقولوا على عيد الأضحى، عيد اللحمة. وده علشان اللحمة بتكون كتيرة في البيوت المصرية، على غير المعتاد في الأيام العادية. وناس كتيرة بتعتبر الفتة هي الأكلة الرئيسية في عيد الأضحى. لكن الفتة مش كل حاجة، فيه 6 أكلات تقدروا تستمتعوا بيها في عيد الأضحى. وهتغنيكم عن أكل الفتة طوال أيام العيد:

1- الكبدة

كتير من المصريين بيفطروا بيها بعد الذبح مباشرة، كعادة قديمة. وبتتعمل على الطريقة العادية بنظام التتبيل والتشويح في الزيت.

2- الرقاق

بيتعمل بطريقة طبقات عجين خفيفة في النص، بتبقى محشية لحوم على حسب المذاق. وفيه منها اللي بتبقى متسقية شوربة.

3- المشويات

لازم العيد مايمرش من غير حفلة باربكيو، وشوي الكباب والكفتة. ويُفضل طبعًا إنها تتبل قبل ما تتشوي بـ 12 ساعة.

4- الممبار

من المفضلات في عيد الأضحى، ولكنه متعب في التنظيف والتجهيز للحشو.

5- الحلويات

ودي بقى بتشمل كل الأطباق الغريبة اللي بيطلق عليها "اكسسوار". منها الفشة والطحال واللسان ولحمة الرأس والكوارع وخلافه. اوعى تفوتك الأكلة دي علشان عظيمة جدًا.

6- الحواوشي

تقدروا تعملوها باللحمة الضاني أو العجالي، وتحددوا نوعية البهارات بتاعتها حسب ما تحبوا. أهم حاجة تقدر تسويها صح في البيت، وهي أكلة شعبية محبوبة جدًا.