ناس كتير بتكتفي بشرب القهوة والشاي علشان تركيزهم يزيد، وغالبًا ده بيكون وقت المذاكرة أو الشغل، وبيهملوا باقي المشروبات، والحقيقة إن فيه قائمة كبيرة من المشروبات المهمة لصحة الدماغ لكن مش كتير يعرفوا قيمتها، وهي بحسب تقرير طبي نشره موقع "الكونسلتو":
الشاي الأخضر
ناس كتير فاكرة إن الشاي الأخضر بيخسس بس ومالوش وظائف ثانية، والحقيقة إنه بيحسن من القدرات العقلية، لإنه بيحتوي على نسبة كبيرة من مادة الكافيين المنشطة للدماغ.
عصائر "التوت -الفراولة –العنب"
كل العصائر دي بتحتوي على نسبة عالية من مضادات الأكسدة، ودي بتحمي خلايا الدماغ من الإلتهاب والتلف، بجانب وجود مادة "الأنثوسيانين" اللي بتساعد على تقوية الذاكرة. ويفضل يتم تحضيرها في البيت، علشان الأنواع المعلبة فيها نسبة عالية من السكر والمواد الحافظة اللي ممكن تسبب ضمور في المخ.
عصائر الخضروات الخضراء
دراسات كتير أكدت إن شرب عصائر الخضروات الخضراء، زي عصير السبانخ، لها دور مهم جدًا لصحة الدماغ، وكمان بتساعد على بطء التدهور العقلي لكبار السن، وده بسبب احتوائها على نسبة عالية من مضادات الأكسدة.
الشوكولاتة الساخنة
مشروب غني بمركبات نباتية بتساعد على زيادة الذكاء وبتقلل فرص الإصابة بالخرف مع تقدم العمر، وعلشان تستفيد من مشروب الكاكاو بأكبر قدر ممكن، ضروري تشربه من غير سكر لأنه في الحالة دي ممكن يضر القدرات العقلية ويزود خطر الإصابة بالاكتئاب.
عصير الليمون
عصير الليمون بيعزز الوظائف المعرفية والإدراكية، لإنه غني بمركبات اسمها "الفلافانول" اللي بتساعد على تحسين تدفق الدم المحمل بالأكسجين للمخ، بجانب حامض الستريك اللي بيحمي خلايا الدماغ من الالتهاب والتلف.
