بدأ رمضان واتغيرت معاه حاجات من الروتين اليومي بتاعنا، منها على سبيل المثال شرب القهوة. ولو انت مدمن قهوة، فعقلك أكيد طول النهار بيفكر في فنجان السعادة بعد الفطار. وطبعًا هتعوض انتظارك ده بأكتر من فنجان.

لكن في الحقيقة الإفراط في شرب القهوة في رمضان مش صح. وضروري جدًا تقلل منها، لأن ليها آثار سلبية على الجسم خاصة في فترة الصيام. فتعالى نقولك ليه لازم تقلل من شربها:

1- القهوة غنية بالكافيين اللي بيعمل على إدرار البول، وبالتالي الجسم بيفقد كتير من السوائل الموجود فيه. وهتحس بالعطش بشكل أكبر.

2- في بداية الصيام بيزيد الإحساس بالصداع. وده لإن نسبة الكافيين في الجسم بتقل فجأة، وكمان بتتغير أوقات تناوله.

3- شرب القهوة في رمضان من أهم مسببات التوتر والقلق خلال ساعات الصيام. علشان كده حاول تقلل منها.

4- غير الصداع، نقص الكافيين في الجسم بيسبب تقلبات المزاج بشكل كبير.

5- الإسراف في شرب القهوة بيسبب زيادة في عدد ضربات القلب. وبالتالي مش من مصلحتك تزود منها.

6- بتأثر بشكل سلبي علي الساعة البيولوجية للشخص، وده بيزود فرص انتباهه في أوقات النوم.

بس ماتقلقش، القهوة برضو لها فوايد كتيرة اعرفها من هنا. المهم نشربها بحساب.