ناس كتير اتعودت تشيل بواقي الأكل أو حتى الأكل الطازة في الفريزر، علشان ترجع تستخدمه مرة تانية وقت اللزوم، معتقدين إن الطريقة دي بتحفظ الطعام على حالته الأصلية، لكن الحقيقة إن مش كل الأطعمة ينفع نشيله في الفريزر ونرجع ناكله تاني عادي، لإن وقتها جودته وقيمته الغذائية بتقل كتير.

ودي 5 أطعمة يفضل عدم تجميدها في الفريرز:

1- منتجات الألبان

وضع منتجات الألبان في الفريزر، وبالذات الزبادي والجبن، بيحول المياه الموجودة فيها لثلج، وبعد خروجها من الفريرز بتتحول لمياه تاني، ودي عملية كفيلة تغير مذاق الأطعمة دي، وكمان بتخليها غير صالحة للتناول.

2- الخضروات والفواكه

اللي فيها مياه معظم أنواع الخضروات والفواكه بتحتوي على نسب عالية من المياه، وبالتالي بعد دخولها الفريرز بتتجمد وتتحول لثلج، وده بيسبب تلفها وبتكون غير صالحة للاستخدام. ومن أبرز الخضروات والفواكه دي: الخس، البطاطس، الخيار، البطيخ، التفاح.

3- اللحوم أكتر من مرة

تجميد اللحوم مرة واحدة كفاية. وفكرة أنك تخرجها من الفريزر تفك وتعرضها للتجميد مرة تانية، أمر غير صحي لإنها بتكون بيئة مناسبة لنمو البكتيريا الضارة، وده بيؤدي للإصابة بأضرار صحية عند تناولها.

4- التوابل

وضع التوابل في الفريزر بيغير طعمها جدًا، وبالتالي لما نضيفها على الأكل مش هتضيف عليه نكهة مميزة، بالعكس هتخلي طعمه مش حلو، علشان كده ماتجمدهاش في الفريرز.

5- الأعشاب الفريش

بتفقد الأعشاب الطازة رونقها ولونها ونسيجها لما بتتحط في الفريزر، بسبب درجة الحرارة المنخفضة، علشان كده يفضل فرمها وتغطيتها بالزيت، وبعدين يتم تجميدها في قوالب مكعبات الثلج.