النوم سلطان ومن غيره تحس إنك تايه ومش في الفورمة. أحلى كام ساعة في اليوم، اللي بيفصلوك خالص عن كل حاجة علشان تقدر تكمل. مش كل الناس بتقدر تحط دماغها على المخدة تروح في النوم على طول. فلو انت بتعاني من قلة النوم بشكل مستمر، هنقول لك في السطور اللي جاية على أكتر 5 أكلات هتخليك تشبع نوم، حسب ما نشر "سكاي نيوز عربي":

1- اللوز

اللوز مصدر جيد للمغنيسيوم، 30 جرام لوز فيهم 80 جرام مغنسيوم. وده العنصر المسؤول عن استرخاء الدماغ والجسم. وكمان بينشط هرمون الميلاتونين اللي بينظم دورة النوم.

2- السلمون

سمكة سلمون واحدة غنية بأحماض أوميجا 3 الدهنية، اللي بتعزز إنتاج "السيروتونين". وده بيساعد الأشخاص اللي بيعانوا من الأرق إنهم يدخلوا في النوم بسرعة.

3- اللبن

شرب اللبن قبل النوم مش بس مفيد للأطفال، ده للكبار كمان. خاصة لما يتم خلط اللبن بالعسل. الدرسات أثبتت العسل عبارة عن كربوهيدرات سريعة الهضم، بتساعد على امتصاص "التربتوفان"، لصنع "الميلاتونين" في الجسم. وده بيساعد على النوم.

4- الكيوي

الدراسات أكدت إن تناول ثمرتين كيوي قبل النوم، بيساعد على النوم بشكل أكبر. لأن الكيوي برضو بيحتوي على نسبة من "السيروتونين". 

5- الديك الرومي

من فوائد أكل الديك الرومي، إنه بيساعد على الاسترخاء وبيقلل العصبية والتوتر. كمان بينظم إفراز هرمون الملاتونين أو هرمون النوم، وبالتالي بيساعد الجسم إنه ينام بأفضل شكل.

يلا تصبحوا على خير بقى.