مين فينا ما بيستناش من السنة للسنة، علشان ياكل آيس كريم براحته، ما هو الصيف مايحلاش من غير آيس كريم، ده حتى من أول الاختيارات اللي بتيجي على بالنا، لما نحب نكسر الحر بشوية طراوة كده وانتعاش، لكن في نفس الوقت لو كترنا منه خصوصًا وقت الطقس الحار جدًا، ممكن يضر صحتنا بأكثر من طريقة، في الموضوع ده هنعرفكم على أضرار محتملة لكتر تناول الآيس كريم زي ما نشرها موقع "الكونسلتو".

1- التهاب اللوز

كون الآيس كريم من الأطعمة المثلجة، فبيكون صعب على اللوزتين تحمله، خاصة لو فضلنا ناكل منه كميات كبيرة، علشان كده ضروري نسيب أي مثلجات بعد خروجها من الفريز شوية، تكون دابت شوية قبل تناولها.

2- صداع الآيس كريم

بيتسبب الآيس كريم في انخفاض درجة حرارة الجسم بشكل كبير بعد تناوله مباشرة، وهنا بيحصل انقباض الأوعية الدموية تلقائي، فا بترسل إشارة ألم لـ الدماغ، وده بيكون السبب وراء شعورنا بالصداع. (كفاية بولتين في اليوم كله)

3- الحساسية

معظم أنواع الآيس كريم، بيدخل في تصنيعها اللبن، ومعروف إن اللبن من الأغذية اللي بتحتوي على اللاكتوز، اللي بيعاني بعض الأشخاص من حساسية ضده، وبيتم تحفيزها عندهم بعد تناول الآيس كريم. فا لو نفسك تاكل آيس كريم، وعندك حساسية لاكتوز، اختار المصنوع من الفواكه الطبيعية بس.

4- زيادة الوزن

بيحتوي الآيس كريم على نسب عالية من السعرات الحرارية، والدهون، والسكريات، وده ميكس ناري يخلي وزنك يزيد في لحظتها، فا نقلل منه خاصة لو تقلنا في الوجبات على مدار اليوم.