على طول بنسمع عن فوائد العسل واستخداماته. بس مش كتير يعرفوا إن فيه منه أنواع كتيرة، وكل نوع مفيد لحاجة معينة. علشان كده إحنا في كلام القاهرة قررنا نقول لكم أنواع العسل واستخداماته، علشان تساعدكم على الاستفادة منه:

العسل السدر

ده من أفضل الأنواع، ومعروف باسم البري كمان. بيُستخلص من شجرة السدر قبل ما تطرح، وكثافته هي الأعلى بين كل الأنواع. بيحتفظ بمكوناته وفوائده لمدة سنتين، وكل ما قدم كل ما كثافته زادت. موطنه الأصلي دولة اليمن، وبيعالج أمراض الكبد والجهاز الهضمي والأنيميا والضعف العام.

عسل القبار

مقارب جدًا للسدر، بيُستخرج من نبات القبار البري اللي بيتواجد في المناطق الصحراوية. وبيستخدم في العلاج الجنسي، تنشيط وظائف الكبد، أمراض الشرايين والجهاز الهضمي، الاستسقاء، التهاب المفاصل، ومرض النقرس.

عسل الموالح

ده بيُستخرج من أشجار البرتقال والليمون واليوسفي وخلافه. بيميل لونه للأبيض وكثافته قليلة، لكن بيحتوي على نسبة عالية من حمض الأسكوربيك، ومضاد للأكسدة. مفيد لحالات الأنفلونزا والبرد والأنيميا وتهدئة الأعصاب، والوقاية من السرطان.

عسل الكينا

مصدره نبتة الكينا البرية، لونه غامق وريحته وطعمه مميزين. بيعالج حالات الربو والحساسية، بيستخدم كطارد للبلغم والحفاظ على الكلى، والتخلص من سموم الجسم.

عسل البرسيم

بيُستخلص من زهرة البرسيم، وبيتميز بالزيوت الطيارة ومستخلص الكوفارين. لونه أصفر فاتح، وبيساعد في تنسيط الجسم واكتسابه للطاقة. بيخفف آلام الحمل والولادة، وعلاج ممتاز للقولون العصبي.