الشوكولاتة بأنواعها تعتبر واحدة من مسببات البهجة في الحياة، اللي ميختلفش عليها اتنين. سيرتها بس تبسط الواحد، ما بالك بقى بطعمها والإحساس الحلو اللي بتديهولك. والجميل بقى إن الشوكولاتة، تحديدًا الداكنة منها، ليها فوائد صحية كتير، هتخليك تحبها أكتر. والفوائد دي حسب ما نشرها موقع "الأهرام" هي:
1- بتمنع تسوس الأسنان
بعض النتائج اللي وصلت لها الدرسات الطبية، بتقول إن أكل الشكولاته بيساعد في حماية الأسنان من التسوس. لإن فيها خصائص مضادة للجراثيم.
2- بتحافظ على صحة القلب
الشوكولاتة الداكنة مليانة مضادات أكسدة، ودي مهمة جدًا لحماية القلب من الأمراض المفاجئة. كمان بتقلل نسبة الكوليسترول في الدم، وبالتالي صحة القلب ووظائفه بتكون أحسن.
3- بتخليك شباب على طول
من خلال مضادات الأكسدة وفيتامينات A و B و C و D و E الموجودة فيها، الشوكولاتة الداكنة بتساعد على تقليل ظهور التجاعيد والخطوط التعبيرية في الوش. فتفضل شباب على طول.
4- المادة الخام للسعادة
أكل الشوكولاتة بانتظام بيزود إنتاج هرمون الإندورفين في الجسم. اللي بدوره بيقلل التوتر، وبيدينا إحساس بالراحة والسعادة.
5- مرطب طبيعي للبشرة
أصحاب البشرة الجافة لازم يجربوا ماسك الشوكولاتة اللي هيساعدهم في ترطيبها، وكمان بتمنع تشقق البشرة أو جفافها بفضل تركيبة الفيتامينات اللي جواها.
يا ترى محتاج كام بار شوكولاتة دلوقتي؟
