شايف نفسك مدمن مانجا؟ أكيل أكيل يعني؟ استعد بقا لمغامرة جديدة ومختلفة هتخليك تعيش يوم مليان بالمانجا. "فيستيفانجو" مهرجان لأول مرة في مصر، هدفه يورينا المانجا بشكل جديد، ونجربها في وصفات مختلفة كتيرة. هتدوق وتاكل أنواعها المختلفة زي (العويس والفونس والتيمور والزبدية والصديقة والفص والكيت والناعومي). وأنواع تانية كتيرة، ممكن تكون ماتعرفهاش قبل كده.

المهرجان مليان برامج ومسابقات كتيرة عاملها المنظمين. زي مين أكتر واحد ياكل مانجا وأكر واحد يشرب مانجا، أكتر Couple ياكلوا وينافسوا بعض، وأنت وشطارتك بقى. وبما أن المانجا فاكهة مبهجة ووجودها بيفرح القلب الحزين، فانت هتاكل وتغني وترقص مع عروض غنائية وترفيهية لفنانين شباب.

يوم جميل هتقضيه مع أصحابك وعيلتك أو حتى لو روحت لوحدك. وعلشان ماترجعش بإيدك فاضية، هتلاقي مشتل لبيع شتلات كتير من المانجا البلدي والتصدير. وسوق للمانجا بجميع أنواعها بسعر الجملة. وسوق للهدايا التذكارية للمهرجان.

فيستيفانجو أو مهرجان المانجو هيكون في فاميلي بارك بمدينة الرحاب، يوم الجمعة 13 سبتمبر. وهيبدأ 2:30 ظهرًا، لحد 10:30 مساءً. وتقدروا تعرفوا تفاصيل أكتر عن المهرجان من هنا.