صحيح الأكل أذواق زي كل حاجة في الدنيا، يعني اللي تحب تاكله هتلاقي غيرك مابيطيقش حتى سيرته. لكن في أكلات لحد دلوقتي مش قادرين نستوعب ليه الناس بتاكلها. ليه الناس بتعذب نفسها  ومعدتها بالطريقة دي، تعالوا نتعرف عليها:

- الفسيخ

الراعي الرسمي للريحة النفاذة بين الأكلات. طبعًا كلنا عارفين إنه أكلة مصرية أصيلة. وشم النسيم مايبقاش معترف بيه، من غير الأكلة العظيمة دي. بس ياجماعة ده سم بيدخل جسمنا.

 

- الملوحة 

اسمها لوحده يجيب أملاح. يعني الناس ماكتفتش بإهانة السمك لما عملوه فسيخ، راحوا عاملين منه ملوحة. 

 

- المش

جنة معفنة أو متخمرة في فخار وحادقة جداً. مش بس كده، دي الناس ماتتمزجش غير لو كانت بالدود بتاعها. ده موضوع محتاج دراسة.

 

- السوشي

ليه بتاكلوا السمك ني يا جماعة ليه؟ وبعدين هي إيه حكايتنا مع السمك واللي بنعمله فيه؟ صحيح اليابان متقدمة وكل حاجة، بس مش كل ما يعملوا حاجة نقلدها. خليهم هم ياكلوه ني وإحنا ناكله مشوي ومتحمر عادي يعني مش حوار.

 

- إكسسوارات البهائم

ودي بقى كوكتيل من أحشاء العجل، مخ تلاقي، ذيل موجود، لسان مايضرش. وطبعا مع الكرشة والفشة علشان الوجبة تبقى متكاملة. وبيكون سعرها أرخص شوية من اللحمة. لا في الحالة دي ناكل سندوتشات الكبدة إياها أحسن.