بالتأكيد صادفت وانت ماشي في الشارع عربية تين شوكي، ما هو من الفواكهة الصيفية اللطيفة، اللي مش محتاج تستني لما تروح عشان تاكلها. لا خالص ده وانت واقف اختار وكل. وبما إن إحنا في موسم ازدهار التين الشوكي وظهوره في الشوارع بشكل كثيف، تعالى نقول لك على فوائد الفاكهة دي حسب موقع "webmed":
- لو بتعاني من عسر الهضم تناول التين الشوكي هيساعدك تتخلص منه فورًا. وده لأنه مليان بالألياف اللي بتسهل حركة الأمعاء.
- اللي بيعملوا دايت لازم يكتروا من التين الشوكي في نظامهم الغذائي. ده هيساهم في تقليل الدهون الثلاثية والكولسترول بشكل كبير.
- كتير من الناس ميعرفوش إن التين الشوكي غني بالحديد، وبالتالي بيعالج الإنيميا وأمراض فقر الدم. لإنه غني بالزنك والحديد.
- أما بقى للسيدات فالميزة دي هتعجبهم جدًا، لإن الدراسات الطبية أثبتت أن التين الشوكي بيزود الكولاجين في الجلد. وده شئ عظيم جدًا عشان البشرة تفضل شباب ومشرقة.
أما عن الأضرار الناتجة عن الحساسية أو الإفراط في تناوله:
- مرضى السكر لازم ياخدوا بالهم، ومايكتروش في تناول التين الشوكي. لإنه بيزود مستويات السكر بالدم .
- الانتفاخ من أبرز أضرار الإفراط في تناول التين الشوكي، وده بيحس به معظم عشاقه بعد تناول 5 ثمرات وأكثر.
- التين الشوكي مليان بذر ودي حاجة مميزة وكل الناس عارفها وبيتاكل عادي. لكن أحيانا الإكثار منه بيسبب انسداد في الإمعاء، ومشاكل صحية تانية فخلي بالك.
- الشعور بالغثيان وعدم قدرة الشخص على إخراج الفضلات خارج جسمه بشكل سليم.
