ناس كتير اتعودت تشرب القهوة أو النسكافية الصبح، علشان يفوقوا ويبدأوا نشاطهم. لكن شرب المنبهات على معدة فاضية بدون أي أكل، بيضر الجسم ويسبب مشاكل صحية كتيرة. 

فلو انت من الناس اللي بتفضل المشروبات على الريق، دي أهم البدائل المفيدة والصحية حسب ما نشر "الكونسلتو":

1- عصير الليمون بالعسل

عصير الليمون الدافي على معدة فاضية مفيد جدًا للصحة العامة. لأنه بيساعد على تقوية الجهاز المناعي، مد الجسم بالطاقة، وتنقيته من السموم. وعلشان تحقق أقصى استفادة من الفيتامينات والمعادن الموجودة فيه، خبراء التغذية بيوصوا على تحليته بعسل النحل. لأن السكر الأبيض بيزود السعرات الحرارية وبالتالي بيزيد الوزن.

 

2- خل التفاح

بيساعد على تنقية الجسم من السموم، خفض الكوليسترول الضار بالدم، تحسين عملية الهضم وكمان فقدان الوزن. المشروب بيتحضر عن طريق إضافة معلقة صغيرة من خل التفاح لكوباية ماء دافي، مضاف إليه شوية قرفة. وطبعًا للتحلية استخدم عسل النحل.

 

3- الشاي الأخضر

بيحتوي على نسبة عالية من مضادات الأكسدة. اللي بتساعد على تقوية المناعة وتنقية الجسم من السموم، ومكافحة الالتهابات والجذور الحرة. كمان بيعزز معدل التمثيل الغذائي ويؤخر ظهور علامات الشيخوخة. ولضمان الاستفادة من قيمته الغذائية يُفضل شربه بارد وبدون سكر.

 

4- الزنجبيل

واحد من الأعشاب الطبيعية الغنية بالفيتامينات والمعادن. وتناوله على معدة فاضية بيساعد على التخلص من آلام المعدة المزعجة، بيمنع الإسهال والقيء. وبيخلي القلب أقل عرضة للأمراض، عن طريق خفض نسبة الكوليسترول الضار بالدم.