الأكل متعة عظيمة في حياتنا. غير إنه اساسي علشان نعيش طبعًا، دايمًا بيكون له إحساس خاص. بيروق علينا كده وبيدينا شوية باور نواجه بيه سخافات أيامنا. هو صاحبك وقت الفرفشة والانبساط، هو اللي معاك بيساندك وقت الإحباط. نص مشاكلك تقريبًا هو اللي بيحلها. ده في أكلات أصلًا مجرد التفكير فيها بيسبب سعادة وفرحة غير طبيعية، وفي السطور اللي جاية هنقول لكم على أكتر 5 أكلات بتسبب السعادة:

1- البطاطس المحمرة (fries)

جاية في أي مصلحة، تاكلها جنب أي أكلة مش هتقول لك لأ. ده غير إنها أول حاجة هتيجي في بالك، لو حسيت إنك جعان ومش عارف تاكل إيه. ممكن ماتبقاش هي الطبق الرئيسي، لكن وجودها مهم وأساسي.

2- البيتزا

شكلها لوحده مبهج. كولكشن ألوان مش بس ينسيك مشكلتك مع مديرك، ده ينسيك اسمك. ومهما بعدت وجربت أكلات تانية، هتلاقي نفسك بترجعلها من غير ما تفكر.

3- مكرونة بشاميل

دي بقى "صاحبة السعادة". ما انت ماتقدرش تنكر الفرح الهستيري اللي بيجيلك، لما تعرف إن الغدا النهاردة مكرونة بشاميل. الأكلة الرسمية في العزومات. بتخليك تجري على البيت علشان تاخد جرعة السعادة، اللي مستنيها بقالك كتير. لا وكمان بنقيس بيها شطارة كل ست.

4- ورق العنب

برنس أكلات المحشي كلها. عصرة الليمون اللي عليه بتوديك في عالم تاني. وبعد ما تضرب الطبق المتين، تحس إنك مبسوط ومتكيف خلاص. مش عايز حاجة من الدنيا بعد كده.

5- الشاورما

الراعي الرسمي للخروجات الحلوة. اسمها بيحسك بالفرحة والجوع في نفس الوقت. هي الاختيار اللي مايختلفش عليه اتنين، ولو اختلفوا يبقى ما بين اللحمة والفراخ. لو اتكلمنا بقى عن قطع الخيار المخلل فيها، أو التومية اللي عليها، ولا البطاطس اللي معاها.. لأ كده محتاجين ورقة وقلم ونبدأ من أول السطر.

وانتوا يا ترى إيه أكتر أكلة بتبسطوا وتغير لكوا المود؟