فيه أطعمة دايمًا بتساعدنا نتحسن لما يكون عندنا دور برد، زي شوربة الفراخ أو الشاي بالزنجبيل. لكن فيه برضو أطعمة معينة لازم نبعد عنها تمامًا، لأنها هتخلي دور البرد يبقى أسوأ. يلا نعرفها في السطور الجاية حسب ما نشر موقع "ذا هيلثي":

1- السكريات

الاستهلاك الزائد للسكريات، من المخبوزات وغيرها، بيضعف جهاز المناعة. ومعدلات السكر العالية في الجسم، بتعيق عمل خلايا الدم البيضاء في مكافحة العدوي. وبتسبب التهابات في الجسم. حتى الحلويات الخالية من السكر، بتحتوي على عنصر "السوربيتول" اللي بيسب مشاكل في المعدة. وأحيانًا بيسبب الإسهال.

2- المقرمشات

الأكلات اللي بتقرمش زي البسكوت والشيبسي وحتى الخضراوات النية، بتزود الكحة والتهابات الحلق. علشان كده الأفضل نستبدله بالطعام اللي قوامه سهل البلع.

3- الأطعمة المشبعة بالدهون

ابعد تمامًا عن الأطعمة اللي كلها دهون زي البرجر، الشاورما، الحواوشي، خلال دور البرد. لأنها هتخلي حالتك الصحية أسوأ، وبتزود احتمال الإصابة بالتهابات.

4- الكافيين

المشروبات اللي بتحتوي على الكافيين زي القهوة، الشاي، المشروبات الغازية، كلها بتسبب جفاف الجسم لإنها مدرة للبول. وده بالتالي بيطول وقت الشفاء. كمان بتحتوي على السكر اللي ذكرنا أضراره.

5- المخلل والأكلات المالحة أو الحامضة

حاول تتجنب كل الأطعمة اللي بتسبب التهابات الحلق، لإنها نفس الأطعمة اللي بتتعب المعدة. وبالتالي بتزود سوء الحالة الصحية. زي المخللات بأنواعها لأنها بتحوي على الخل والملح، أو الموالح والحمضيات.

6- الأكلات الحراقة

صحيح الأكلات الحراقة ممكن تفتح قنوات التنفس المسدودة. لكن لو بتعاني من مشاكل في المعدة أبعد عنها تمامًا في حالة الإصابة بدور برد. لأنها هتزود البرد وهتتعب المعدة أكتر.