كتير مننا بيصحى على كوباية القهوة، علشان تظبط المزاج وتدينا باور نكمل اليوم. لكن بعض الإضافات اللي بنزودها عليها، ممكن تحول الكوباية دي لكارثة صحية. وتتسبب زيادة الوزن وأمراض القلب والأوعية الدموية. فتعالوا نعرف الإضافات اللي لازم نبعد عنها، حسب ما نشر "الكونسلتو":

1- مبيض القهوة (الكريمر)

مبيض القهوة أو الكريمر بيحتوي على نسبة عالية من الصوديوم والفوسفات. واللي أثبتت الدراسات أن تناول كميات كبيرة من العنصرين دول، بيزود خطر الإصابة بأمراض القلب والأوعية الدموية. غير إنه بيمثل خطر على مرضى الكلى المزمنة.

 

2- بدائل السكر

الشائع عن بدائل السكر أو المحليات الصناعية، إن لها قدرة على إنقاص الوزن. وده بيخلي بعض الناس تضيفها على القهوة بكميات كبيرة. لكن فيه دراسات أثبتت أن المشروبات المضاف لها بدائل السكر، مالهاش أي قيمة غذائية. والسعرات الحرارية فيها عالية.

 

3- كريمة القهوة

فيه أنواع معينة من القهوة زي الكابتشينو واللاتيه، بيكون طعمها مميز لما يتضاف عليها الكريمة. لكن الضرر هنا إن كل معلقة كريمة فيها 5 جرام سكر. وبالتالي إضافة 3 ملاعق كبيرة من الكريمة، يعني إضافة 15 جرام سكر للفنجان الواحد.

 

4- النكهات

علشان نحلي طعم القهوة، أحيانًا بنضيف نكهات زي الفانيليا والبندق والكراميل. بس النكهات دي بتحتوي على سكريات عالية جدًا، بتوصل لـ 58 جرام سكر. فضروري نلتزم بالحذر وإحنا بنستخدمها.

 

5- السكر البني

ناس كتير بتستخدمه كبديل صحي للسكر، وبيتناولوا كميات كبيرة منه. لكن الدراسات أثبتت إن له دور في أمراض السمنة والسكري من النوع التاني.

 

6- اللبن المكثف

من الإضافات غير الصحية للقهوة الصباحية، بسبب احتوائه على 130 سعر حراري و22 جرام سكر.