حب الأكل نوع أنواع الإدمان، بتتحكم فيه هرمونات جوة أجسامنا. بتخلي الشخص يفقد السيطرة على نوع الأكل وكميته. والأمر مش بس بينتهي بالسمنة، ده بيوصل لأمراض صحية ونفسية زي الاكتئاب. علشان كده هنقولكم على نصائح من خبراء تغذية، حسب ما نشر "برايت سايد"، بتساعد في مكافحة إدمان الأكل:

1- اعتمد على الأطعمة المغذية بدل المصنعة

المنتجات اللي بتحتوي على مستويات عالية من السكر والمحليات الصناعية والدهون، بتسبب إدمان الطعام. من خلال تحفيز التفاعلات الكيميائية في الجسم. والأطعمة المصنعة فيها كل ده. علشان كده لازم نعتمد على الأطعمة الصحية المغذية، زي الفاكهة والخضار.

 

2- اتحكم في الكمية

لو مش قادر تستبعد الأطعمة غير الصحية من قائمتك، حاول تقلل الكمية اللي بتاكلها. يعني لو كنت عايز تاكل شيبسي، اشتري أصغر كيس. كمان حدد أأمن وأقل كمية من أكل معين، وماتزودش عنها. ولو لسه جعان، استنى حوالي 30 دقيقة قبل ما تاكل كمية تانية. وغالبًا خلال الوقت ده هتقل رغبتك في الأكل.

 

3- كُل وجبات صحية بانتظام

تقدر تقلل رغبتك في أي نوع أكل، من خلال تناول وجبات صحية متوازنة بشكل منتظم. والأفضل تكون في الفطار، بما إنه أهم وجبة في اليوم. لو بدأت يومك بأكل صحي، ده هيتحول مع الوقت لروتين في باقي الوجبات.

 

4- غير عاداتك الاجتماعية

تغيير روتينك اليومي ممكن يكون هو أكبر عامل مساعد، في التخلص من عادات الأكل غير الصحية. حاول تقضي وقت أكبر في الأنشطة، الخالية من الأكل. مثلًا بدل ما تروح مع أصحابك تاكل في مطعم، ادخل سينما أو روح مكان فيه ألعاب ترفيهية.

 

5- خد بالك من الأكل المرتبط بالحالة المزاجية

في ناس متعودة تاكل كتير لما تكون متضايقة، على أساس إن الأكل بيحسن المود. لكن العكس صحيح، ده بيزود الشهية تجاه الأكل غير الصحي. لأن الاختيار بيقع على أكلات زي البيتزا أو الحلويات. تقدر تتغلب على العادة دي بطرق صحية أكتر، زي ممارسة تمارين التأمل واليوجا،  تتكلم مع صديق، أو تتفرج على مسلسل.

 

6- اطبخ أكلك في البيت

غير إنك هتوفر فلوس، أكل البيت صحي أكتر، وبيديك تحكم أكبر في مكوناته. لإنك لما بتعرف بالظبط مقدار الملح أو السكر أو الدهون اللي موجودة في طبقك، بتقدر تظبط الأكل حسب احتياجاتك الصحية.