مؤخرًا ناس كتير بدأت تهتم بنوعية أكلها، وبتحرص إنه يكون صحي علشان يبعدوا عن الأمراض والسمنة. لكن في نفس الوقت الطريقة الغلط لتناول بعض الطعام ده، بتمنع الجسم من الاستفادة منه.

علشان كده هنقولكم على مجموعة من الأطعمة، غالبًا بتاكلوها بطريقة غلط وانتوا مش عارفين، حسب ما نشر "برايت سايد":

1- الكيوي

قشرة الكيوي مليانة فوايد زي الألياف وفيتامين E. لكن معظمنا اتعود تقشيرها قبل أكلها. وبالتالي فوائدها مبتوصلش للجسم بالشكل المطلوب.

 

2- الطماطم

 من الأطعمة المغذية وبتحمي من الأورام وأمراض القلب. الدراسات أثبتت إن العناصر الغذائية اللي فيها بتزيد لما بيتم تسخينها في المياه لحوالي 194 درجة.

 

3- الشاي

المشرب الرسمي لشعوب كتير. لكن يُفضل إنه يتشرب لوحده، بدون إضافة اللبن. لأن بروتينات اللبن بتخلي العناصر الغذائية في الشاي صعبة الامتصاص، وبالتالي بيفقد الجسم كل فوائد القلب والأوعية الدموية من الشاي.

 

4- الفراولة

غنية بالألياف ومضادات الأكسدة وفيتامين C. زيها زي معظم الفواكه الحمراء، مش المفروض أبدًا تقطيع الفروالة قبل تخزينها. لأنها بتكون حساسة للضوء والأكسجين. وبتفقد قيمتها بسهولة جدًا. فلازم تتخزن بحالتها الطبيعية.

 

5- البروكلي

واحد من الأطعمة اللي يُفضل بتتاكل نية أو على البخار. أما غليان البروكلي أو قليه، بيفقده فوائد كتير منها: فيتامين C، الكلوروفيل، مضادات الأكسدة والمركبات المضادة للسرطان. واللي كلها ضرورية جدًا للجسم.

 

6- الفاصوليا

الفاصوليا المجففة مليانة فوائد ومركبات مضادة للأكسدة وفيتامينات ومعادن. لكنها صعبة الامتصاص على الجسم. فبالتالي لازم يتم نقعها يوم كامل قبل تحضيرها، علشان يقدر الجسم ياخد الفوايد منها بالكامل.

 

7- الثوم

بيحتوي على "الأليسين"، وده إنزيم مضاد للأورام، قوته بتزيد لما بيتعرض للهواء. بالتالي مهم جدًا نقطع الثوم قبل استخدامه، ونسيبه في الهواء لمدة 10 دقائق على الأقل. بالطريقة دي هتكون فوائده مذهلة.

 

8- المياه اللي فوق الزبادي

المياه اللي بنلاقيها على الزبادي أول ما نفتحه، دي مادة اسمها "مصل اللبن". دي فيها بروتينات وفيتامين B12. المفروض المياه دي ما تترميش، بالعكس اخلطها كويس مع الزبادي وكلها.

 

9- الخيار

طبعًا الخيار لازم يتاكل بقشرته، لإنه مليان ألياف مفيدة جدًا. ومع ذلك لو مش متاكد من مصدر الخيار، أو مش عارف تغسله كويس، يُستحسن تشيل القشرة. علشان تتجنب أي مبيدات حشرية أو بكتيريا عليها.