كل واحد فينا لو دور جواه، أكيد هيلاقي نفسه موهوب في حاجة. وأحيانًا حد تاني اللي بيكتشف موهبتنا وينميها ويطورها. في حالة محمد صلاح كان اللي اكتشف موهبته، هو كابتن حمدي نوح.. لاعب المقاولين السابق.
كلام كابتن حمدي كان في مداخلة هاتفية مع برنامج "هنا العاصمة"، بمناسبة عيد ميلاد محمد صلاح. كانت فرصة يهنيه فيها ويتمناله كل التوفيق في اللي جي من حياته.
حسب ما نشر "cairo 360"، النجاح اللي وصل له صلاح كان سبب كبير في سعادة كابتن حمدي. اللي بيعتبر صلاح واحد من أبناؤه. وبيقول إنه رغم الشهرة الكبيرة اللي حققها، إلا إنه مازال إنسان متواضع.
كابتن حمدي كان له دور كبير في تنمية موهبة صلاح من أول أيامها. باعتباره كان المسؤول عن تدريبه. وقال إنه ربنا وفقه لإنه إنسان طيب ومحترم. وكل ما بيكبر، اسم نادي المقاولين بيكبر معاه. ودي حاجة بتخليه فخور بالنادي اكتر.
