الأكل افتكاسات. كل مكان أو بلد في الدنيا لها افتكاساتها المعينة في الأكل. وطبعًا إحنا في مصر مانتوصاش بحاجة زي دي. عندنا حاجات بتتاكل مع بعضها، تقريبًا مش موجودة في أي مكان تاني. بنجمع أي حاجة على أي حاجة، وتبقى أكلة طبيعية جدًا زي غيرها. تعالوا نبص بصة على الافتكاسات المصرية الأصيلة بتاعتنا:
- جبنة وبطيخ
دي الأكلة الرسمية للصيف، هي اللي بتسيطر في أيام الحر والفرهدة. تنفع غدا أو عشاء عادي، لإنها لطيفة على المعدة وبتنعش الجسم وبترطبه.
- سكلانس
ده عبارة عن حفلة معمولة في سندوتش. لأنه بيتكون من (قشطة - مربي - حلاوة طحينية - عسل). حاجة كده تديك باور تخليك تفوت في الحديد. سندوتس يلعلع في النفوخ، اختراع اختراع يعني مفيش كلام.
- ديناميت
ده حفلة تانية معمولة في سندوتش، بس حادق بقى. محتاج معدة تكون حديد، لإنه ميكس (فول - طعمية - بتنجان - بطاطس صوابع - بيض مسلوق). كل ده في رغيف عيش بلدي، واضرب يامعلم.
- مسقعة وكشري
يعني إحنا مش مكفينا إن الكشري أصلًا ميكس حاجات كتير، فحطينا عليه مسقعة. اللي هي كده كده بتتعمل أكلة لوحدها، سواء عادية أو باللحمة المفرومة.
- عسل أسود وطحينة
صحيح افتكاسة، بس من أكتر الأكلات المغذية اللي بتحارب الأنيميا. لإن العسل مليان حديد والطحينة كلها كالسيوم. بعض الدكاترة بينصحوا مرضاهم إنهم ياكلوها، علشان صحتهم تكون أحسن.
- القنبلة
مستحيل تلاقي حد بيعمل كده في نفسه غير المصري المفتري. قاعد وقدامه علبة فيها (بسبوسة - كنافة - أرز بلبن - قطع مانجو - قطع تفاح - قطع موز - قشطة) حاجة كده تعمل أحلى غيبوبة سكر. دي بقى مزاج الأكيلة اللي مايهمش أي حاجة.
