وصلنا للميعاد السنوي اللي كلنا مستنينه، واللي ميغمضلناش عين إلا وإحنا كاتبين "ليسته" طويلة عريضة لأهدافنا في السنة الجديدة، وماتنكرش إنك وأنت بتقرأ أهدافك دي، سامع صوت داخلي بيقول لك: "اللي يكمل يكمل واللي يمشي يمشي والبقاء للأقوى"، وعلشان كل حاجه حوالينا اتغيرت السنة اللي فاتت، فأنت أكيد لسه ماحققتش حاجات كتير كنت مخطط لها زي النهارده بالظبط من 365 يوم، والأكيد كمان إنك لازم تعيد حساباتك وتفكر بطريقة تانية خالص عن كل السنين اللي فاتت وأنت داخل 2021، تعالى نقول لك تعمل إيه:

1- اهتم بصحتك

"كل اللي فات حمادة واللي جاي حمادة تاني خالص"، صحتك هي اللي باقية لك السنين اللي جاية دي، إنسى بقى بيتزا نص الليل واشتراك الجيم اللي بتدفعه وماتروحهوش غير مرة في الشهر، واسمع كلام "شعبولا" وبطل السجاير وكون إنسان جديد وأيوه شيل حديد، ولو أنت ممشي حياتك بالبركة، فصحتك بالذات ماينفعش تستهتر فيها، لإن زي ما أنت شايف كلنا في مركب واحدة.

2- خليك ممتن لكل حاجة حواليك

فعلًا مابنحسش بقيمة الحاجة إلا لما تروح مننا، كلنا بلا استثناء حسينا بقيمة المقولة دي، وعرفنا إن اليوم اللي كان بيعدي عادي ده، كان نعمة كبيرة مش عارفين قيمتها، طبعًا ده لو قارناه باللي حاصل دلوقتي، يعني مطلوب منك تنبسط باللي معاك مهما كانت إمكانياتك، والأهم إنك تقدر نعمة وجود أهلك وأصحابك حواليك.

3- اعمل مشروع جنب شغلك

كلنا مرينا بظروف اقتصادية ماكنتش أحسن حاجة السنة اللي فاتت، بسبب أزمة فيروس "كورونا"، وناس كتير فقدت شغلها الأساسي ومصدر رزقها الوحيد، وعلشان ماتقعش في الفخ ده تاني، اخرج من "زوون" وظيفة العمر كله دي، وفكر في مشروع يجيب لك دخل كل شهر، دور جوه نفسك وهتلاقي مواهب وقدرات ماكنتش متخيل وجودها.

4-  متأجلش حاجة في حياتك

كفياك دلع ووعود لنفسك بإنك هتعمل ومابتعملش، هو صحيح الجو برد بس كمان سريرك وبطانيتك مش هيطيروا، صحيح كمان ظروف "كورونا" معطلة حاجات كتير حوالينا، لكن ده مايمنعش إنك تنجز أهدافك في حدود اللي تقدر عليه، وياسيدي كل حاجة بقت أونلاين بس انت تنوي.

5- اتعلم تتأقلم

التجربة اللي عيشتهالنا 2020، علمتنا إن "دوام الحال من المحال"، ماننكرش إن الدرس كان صعب شويتين، بس صحيت جوانا فكرة إننا مانتمسكش بالحاجات بشكل مرضي، ونتعود نلاقي بدايل لأي شئ لإن الحياة لازم تستمر.

6- استمتع بكل لحظة

الشغل اللي مش بتحبه، وزميلك اللي مش طايقه، وأهلك اللي نفسهم يجوزوك وأنت مش عاوز، وحاجات تانية كتير مافيش داعي نفكرك بيها دلوقتي، كل دي حاجات ممكن تشوفها بشكل أحسن علشان سلامك النفسي مهم جدًا في المرحلة دي، حاول تتبسط بالموجود لحد ما الأزمة تعدي.

كل سنة وأنت قادر تحقق كل اللي ماتحققش من 2020.