خلاص كلها يومين ونحتفل بالعيد. صحيح الظروف حوالينا مختلفة، لكن ده مش هيمنعنا نفرح وننبسط ونقضي أجمل وقت. ولو كنا في العيد بنروح حفلات النجوم، المرة دي النجوم هم اللي هيجولنا البيت. علشان كده جمعنا لكم في "كلام القاهرة" كل حفلات أسبوع العيد، اللي هنشوفها أونلاين. تعالوا نعرفها مع بعض:
تامر حسني
نجم الجيل تامر حسني هيقدم حفلة لايف على مسرح الصوت والضوء. الحفلة هتكون من غير جمهور، وهتتذاع على قناة ON و DMC في سهرة أول أيام العيد.
عاصي الحلاني - وائل جسار - كاظم الساهر على قناة وزار الثقافة على يوتيوب
قناة وزارة الثقافة على يوتيوب، هتقدم لجمهورها أجمل الحفلات على مدار أيام العيد. أول يوم حفلة للفنان عاصي الحلاني. واليوم التاني حفلة للنجم وائل جسار. أما تالت يوم هيكون من نصيب القيصر كاظم الساهر. كل الحفلات هتتذاع الساعة 9 مساءً.
ديسكو مصر - ويجز ومروان موسى على قناة we على يتويوب
شبك "we" هتشارك في احتفالات العيد من خلال قناتها على يوتيوب. وهتقدم تاني يوم العيد، 25 مايو، حفلة لفريق "ديسكو مصر". وتالت يوم العيد، 26 مايو، حفلة هتجمع ويجز ومروان موسى. التفاصيل من هنا.
نانسي عجرم
أعلنت النجمة نانسي عجرم عن حفلة لايف من خلال قناتها على يوتيوب. الحفلة هتكون يوم 26 مايو تالت يوم العيد الفطر، وهتقدم فيها مجموعة من أجمل أغانيها.
أمال ماهر
من قدام الأهرامات هتقدم المطربة آمال ماهر أول حفل غنائي لها من غير جمهور. الحفلة هتتذاع لايف، لكن ماتحددش الميعاد والقناة.
تامر عاشور
الفنان تامر عاشور أعلن من خلال حسابه على فيسبوك، عن تقديمه لحفلة أونلاين خلال العيد. هتكون على قناته على يوتيوب. التفاصيل من هنا.
