مرة تانية اتجددت الأزمة بين الفنان محمد الشرنوبي وسارة الطباخ، خطيبته السابقة وصاحبه شركة "إيرث برودكشن" الوكيل الحصري لكل أعماله، بعد إعلان "الشرنوبي" إمبارح في فيديو على إنستجرام، إنه حصل على حكم نهائي من المحكمة بإنهاء عقده مع الشركة.

شرنوبي قال: "ياجماعة أنا بقيت حر، الحمد لله بعد 3 سنين من المشاكل والقضايا ومحاولات تعطيل شغلي، المحكمة حكمت حكم نهائي بانتهاء عقدي مع الشركة المنتجة، وأي محاولات من الشركة تطلع بيان بعد كدة تبقى بائسة وغير قانونية، واستنوني بحضر حاجات لذيذة قريب، أخيرًا هعرف أغني براحتي لأن خلال الـ3 سنين اللي فاتوا ما كنتش عارف أغني، وشكرًا على وقفتكوا جنبي طول الفترة اللي فاتت".

بعد انتشار الفيديو بكام ساعة، كذبت سارة الطباخ كل الكلام اللي قاله الشرنوبي، وأكدت من خلال بيان أصدره المحامي الخاص بيها المستشار ياسر قنطوش، إن الحكم القضائي اللي صدر لصالحها ومش لصالح شرنوبي. ووضح البيان إن الحكم بيشمل نقل تبعية العقد بينهم للشركة الجديدة المملوكة لها وفسخ العقد القديم، وأن كل تبعات والتزامات التعاقد لسه سارية، وبكده الشركة هي الوكيل الحصري لأعمال محمد الشرنوبي حسب العقد، ولا يجوز لأي جهة أنها تسمح له بالعمل إلا بموافقة سارة الطباخ، واللي من حقها تتحرك ضده في النقابات الفنية لإيقافه عن العمل وتطالبه بتنفيذ الحكم، وإعادة كل المبالغ المادية اللي حصل عليها خلال عمله في السنين اللي فاتت بعيد عن الشركة.

وسبق ونشر محمد الشرنوبي قصة تعارفه على سارة الطباخ، وضح خلالها إنه اتعرف عليها بعد مسلسل "لا تطفئ الشمس" وبداية انتشاره كممثل، ومع الوقت حصلت بينهم قصة حب واتخطبوا رغم عدم مواقفة والده وعدم حضوره قراية الفاتحة، لأسباب ليها علاقة بفرق السن بينهم. وقتها اقنعته بإنه يتعاون مع شركتها ويتجه للغناء أكتر، وبالفعل وافق ومضى على عقد احتكار مدته ١٠ سنين بشرط جزائي ٦٠٠.٠٠٠ دولار، على أساس إنه مجرد شكليات ويقدر يلغيه في أي وقت.

المشاكل زادت ما بينهم والتوتر بدأ يزيد، فقرر شرنوبي فسخ الخطوبة بعد 3 شهور بس، وقتها ماكانوش لسه اشتغلوا على الألبوم، فقال لسارة إنه مش حابب يكمل شغل وعلاقتهم تكون في إطار الصداقة أفضل، وبعد تدخل المقربين منهم رجعوا لبعض تاني، لكن المرة دي المشاكل خدت شكل تاني واتدخل فيها الأهل والأصدقاء. ولما حاول الشرنوبي يمشي بدأت سارة تضغط عليه بالعقد، ومتردش على أي حد يطلبه في شغل ولا على مكالمات الميديا والصحفيين، وبدأت القصة تتجه للمحاكم والقضاء. (حسب البوست اللي نشره شرنوبي يوم 21 يوليو 2019).

بالمناسبة في شهر يونيو 2020، اتجوز محمد الشرنوبي مديرة أعمال المطربة أنغام راندا رياض، لكن اتردد الفترة الأخيرة إنهم انفصلوا، وحذفوا الصور اللي بتجمعهم سوا على السوشيال ميديا.