ولا إيه القصة حبيبي فيدني واللي أذوك ياما حبيبي سيبني"، ده جزء من تراك ويجز الجديد "البخت"، واللي معظمنا ماشي يغنيه طول الوقت، وكمان حقق تريند رقم "1" على يوتيوب و "6" على العالم بأكتر من 2 مليون مشاهدة في أقل من يومين.
يا ترى ليه التراك ده حقق نجاح كبير وعلق مع الناس؟ دي محاولة للتفسير:
صوت ويجز فيه حزن نبرة الحزن
اللي سمعناها في صوت ويجز المرة دي، خلت ناس كتير تتعاطف معاه هو شخصيًا، وحسوا إنه مش مجرد تراك عادي لأ، ده ويجز شكله موجوع فعًلا! وده بيدل إنه قدر يوصل إحساس الأغنيه صح. وانتشر الكوميكس ده: "قوم يا وجوزة بالله عليك غدي النونة والعب بالغزالة العب بالسبعمية. إحنا مش حمل وجع القلب ده يابني".
كلامه جه على الجرح
طاقة حب على شحتفة، هتحسها وأنت بتعيد وتزيد في الأغنية، هتلاقي نفسك بتروح في حته كده كلها حنين لشخص معين، ممكن تكون مش عارف هو مين؟ بس عادي. بالذات في الحتة دي: "براحة علي قلبي المكسور اللي مشكلته إنه فيك مسحول". وياسلام بقى لو كنت بتحب من طرف واحد أو عيشت علاقة فيها رفض قبل كده.
مفهومة بس مش أوي
في الأول هتفتكر نفسك فاهم الكلام وهتتفاعل معاه عادي، بعد كده هتتلخبط شوية، ياترى هو بيكراش على واحدة ورفضته، ولا بيحاول ينسى علاقة قديمة ولا إيه الحكاية، ودي حلاوة أغاني ويجز الصراحة.
هنموت ونعرف مين كسرت قلب ويجز
ياترى مين كسرت قلب ويجز؟ السؤال ده ناس كتير عايزة تعرف إجابته دلوقتي، لسببين أولهم إن ويجز اتحول لمطرب عاطفي وده ماكنش متوقع منه خالص، وإذا كان في علاقة بجد فهو طلع رومانسي أوي وبهدلنا معاه بس وإحنا مبسوطين، السبب التاني فضول مش أكتر.
"البخت" اتغنت لـ هدي المفتي ولا مين؟
ويجز وهدى المفتي اشتغلوا مع بعض مسلسل "بيبمو"، والفترة دي كانوا بيظهروا دايمًا مع بعض في الصور على السوشيال ميديا بحكم شغلهم، فالناس ربطت ده بإنهم كانوا في علاقة، واحتاروا أكتر لما نشرت هدى ستوري على إنستجرام مع أغنية البخت، فياترى الإشاعات دي وصلت ليها وعايزة تثبت حاجة معينة، ولا التراك عجبها وبتشجع صديقها وبس؟
في النهاية يا جماعة التراك حلو اسمعوه.
