من ساعات، حل النجم محمد منير ضيف على الفنانة والمذيعة إسعاد يونس في برنامجها "صاحبة السعادة"، واتكلم معاها في قعدة رايقة عن تفاصيل وأسرار كتير في حياته مش كتير يعرفوها. تعالوا نتعرف أهم تصريحات الكينج خلال اللقاء:
1- في بداياتي ومن لحظة وصولي لمحطة رمسيس، وأنا كنت متأكد أن هيبقي ليا شأن كبير في مصر زي ما وعدت والدي، وصممت على ده.
2- بعتز بعيلتي جدًا، وعندي 18 حفيد من أبناء أخواتي، ببعتلهم فلوس كل فترة، وعلمتهم حب الوطن والمشاركة في الانتخابات وينزلوا يقولوا رأيهم، علشان مينفعش مايعملوش كده عشان عمهم أو خالهم محمد منير.
3- أخويا الكبير فاروق، هو اللي وصلني للعالمية لإنه كان بيعرف إنجليزي وساعدني كتير في جولاتي في أوروبا، علشان أقول أنا محمد منير المغني من ريحة مصر، وكان بيدني مصروف 10 قروش في اليوم يعني 3 جنيه في الشهر.
4- الحفلة بالنسبالي مش مجرد مطرب وجمهور، الحفلة بالنسبالي مطرب وأجيال كثيرة.
5- أنا المطرب الوحيد اللي يحبه الجد والإبن والحفيد، وأشكر الله على النعمة دي.
6- بقول لكل جمهوري، حبوا بلدكم لو حبيتوها هتديلكم، قيادة ودولة، أنا بستنى أول طائرة وأنا مسافر علشان أرجع مصر، ولما بشوف بلدي من فوق بحس إني ملك وزعيم.
7- مصر بالنسبالي هي سيد درويش وبليغ حمدي ومحمد عبد الوهاب والسنباطي وكمال الطويل ومحمد الموجي ومحمد قنديل وعبد المطلب وشفيق جلال وأحمد عدوية، وفي الآخر عمرو دياب ومحمد منير.
8- عندي أختين عايشين معايا في البيت، أكبرهم سنها 84 سنة ودي البركة بتاعة بيتي، والتالتة راعتني بعد أزمتي الصحية الأخيرة، روح أخواتي موجودة، فامبقدرش أعمل أي حاجة تغضب ربنا.
9- كافحت 42 سنة في حياتي عدد ممكن يبان كبير، لكن مايهمنيش يوم ولا 100 سنة ربنا يديني العمر لحد ما أوصل 150 سنة.
10- أنا والأيام اللي عدت كنا أصدقاء، مفيش بيني وبين الرقم أي مشاكل، أنا بحب كل يوم بيمر في حياتي.
لقاء الكينج في برنامج صاحبة السعادة، هيكون على مدار أربع حلقات، وهيتذاع أيام الإثنين والثلاثاء.
