تصدرت الفنانة شيرين سيف النصر تريند "جوجل"، بسبب انتشار صورة حديثة لها على السوشيال ميديا، بعد غياب حوالي 12 سنة عن الفن وكمان الظهور بشكل عام، رغم انتشار صور لسيدة تشببها من وقت للتاني!
نالت الصورة إعجاب عدد كبير من جمهور الفنانة، وأكدوا إنها لسه محتفظة بجمالها الطبيعي المعروفة بيه مع زيادة بسيطة في وزنها، وكمان طالبوها بالرجوع تاني للتمثيل.
وكشفت "شيرين" عن سر اختفائها في مداخلة هاتفية مع برنامج "مساء دي إم سي"، وقالت إنه بسبب وفاة والدتها، وإنها تعبت أوي لما اتوفت، فبعدت". وقالت: كانت كل حاجة في حياتي، وبتقف جنبي وتقرالي الأفلام والمسلسلات، والصحافة تكلمها، وكانت شيلاني شيل، وبعدين ملقتش ورق اللي بيجيلي كويس" وأكدت إنها دلوقتي بتدرس رجوعها للفن.
وتابعت: في أعمال اتعرضت عليا الحقيقة وهي جميلة، وممكن أرجع قريب خلال شهرين أو ثلاثة بعمل سنيمائي، وخلال الـ 12 سنة كنت متابعة للأعمال الفنية كلها، وكنت بسافر كتير".
أما عن كواليس الصورة اللي انتشرت، قالت إن صاحبتها صورتها ليها من أسبوعين، وكانت قلقانة من رد فعل الناس عليها، خاصة إنها من غير مكياج، لكن اتفاجأت بترحيب ماكنتش متوقعاه.
شيرين سيف النصر علاقتها اتقطعت بأصدقائها في الوسط طول السنين اللي فاتت، وقالت إنها كانت بتسأل عن النجم عادل إمام لكنها متصلتش به نهائي، علشان بيتقال إنه مبيردش على حد، وأضافت إنها اتصلت بالفنان سمير صبري قبل وفاته بأسبوع، وكانت نفسيته عالية، وإنها مقابلتش هيثم أحمد زكي أو اتصلت به خالص، لكن الراحل والده أحمد زكي وممدوح وافي كان بيننا اتصالات دائمة.
